Рақибони паҳлавонони тоҷик дар мусобиқаи ҷудо "Tel Aviv Grand Slam 2021" маълум шуданд
Дар мусобиқаи байналмилалии ҷудо “Tel Aviv Grand Slam 2021”, ки имрӯз, 18-уми феврал, дар пойтахти Исроил – Тел-Авив шуруъ мешавад, Тоҷикистонро шаш варзишгар намояндагӣ хоҳад кард.
Ба иттилои сомонаи расмии Федератсияи байналмилалии ҷудо (IJF), дар ин мусобиқа иштироки 422 варзишгар (248 мард ва 174 зан) аз 60 кишвари панҷ қораи ҷаҳон дар назар аст.
Ба ҳайати мунтахаби Тоҷикистон шаш варзишгар - Сомон Маҳмадбеков, Беҳрӯзи Хоҷазода (ҳарду дар вазни то 73 кило), Акмал Муродов (то 81 кг), Комроншоҳи Устопириён (то 90 кг), Темур Раҳимов ва Шакармамад Мирмамадов (ҳарду дар вазни +100 кг) – дохиланд.
Рӯзи аввали мусобиқа – 18-уми феврал – қувваозмоиҳо дар вазнҳои -60 кг, -66 кг миёни мардон ва -48 кг, -52 кг, -57 кг миёни занон доир мегардад. Дар рӯзи дувум – 19-уми феврал - гуштигирони вазнашон -73 кг, -81 кг миёни мардон ва -63 кг, -70 кг миёни занон рақобат хоҳанд кард. Мусобиқа бо қувваозмоиҳои варзишгарони вазнашон -90 кг, -100 кг, +100 кг миёни мардон ва -78 кг, +78 кг миёни занон ба поён мерасад.
Бар асоси қуръакашӣ рақибони паҳлавонони тоҷик дар марҳилаи муқаддамотӣ маълум шуданд. Дар рӯзи дувуми мусобиқа – 19-уми феврал – се паҳлавони тоҷик ба рақобат мепардозанд. Сомон Маҳмадбеков бо ғолиби ҷуфти Рока Салвадор Касес (Испания) - Адам Стодолски (Лаҳистон) қувваозмоӣ мекунад. Беҳрӯзи Хоҷазода бо варзишгари узбек Ҷалолиддин Бойназаров вориди рақобат мешавад. Акмал Муродов бошад, бо Александр Виежерзак аз Олмон рақобат хоҳад кард.
Дар рӯзи севуми мусобиқа – 20-уми феврал – Комроншоҳи Устопириён бо Юто Галаррето Виллар аз Перу, Темур Раҳимов бо Ерассил Кажибоев аз Қазоқистон ва Шакармамад Мирмамадов бо Наор Итаҳ аз Исроил қувваозмоӣ мекунанд.
Варзишгарон дар ин мусобиқаи байналмилалӣ ба ҷуз аз медал соҳиби имтиёзҳои олимпӣ хоҳанд шуд. Барои ҷойи аввал 1000 имтиёз, барои ҷойи дувум 700 имтиёз, барои ҷойи севум 500 имтиёз дода мешавад.
Инчунин ба беҳтаринҳо ҷоизаҳои молӣ тақдим мегардад. Дар ҳар як вазн ба ғолиб 5000 доллари ИМА, барои ҷойи дувум 3000 доллар ва барои ҷойҳои севум 1500-долларӣ супурда хоҳад шуд.
Зимнан, “Tel Aviv Grand Slam” ин дувумин мусобиқа аз силсилаи мусобиқаҳои Федератсияи байналмилалии ҷудо дар соли 2021 мебошад. Моҳи январ дар мусобиқаи устодони ҷаҳонии ҷудо (World Judo Masters), ки дар Доҳаи Қатар баргузор шуд, аз Тоҷикистон се варзишгар – Сомон Маҳмадбеков, Беҳрӯз Хоҷазода ва Темур Раҳимов - иштирок карданд.
Аз байни онҳо натиҷаи беҳтарро дар ин мусобиқа Темур Раҳимов ба даст овард. Ин паҳлавони 23-солаи тоҷик дар вазни сангинтарин (+100 кг) аз панҷ қувваозмоӣ дар сетоаш пирӯз шуда, дутоашро бохт ва дар натиҷа мақоми панҷумро соҳиб шуд.
Варзишгарон мувофиқи талаботи низомномаи Бозиҳои тобистонаи олимпии Токио то моҳи июни имсол имкон доранд, ки имтиёзҳо ба даст биёранд ва мавқеашонро дар феҳристи ҷаҳонӣ ва инфиродии олимпӣ беҳтар намоянд. Баъдан Федератсияи байналмилалии ҷудо феҳристи ниҳоии ҷаҳонӣ ва инфиродии олимпиро нашр мекунад ва 22 нафар беҳтаринҳо дар ҳар вазн соҳиби роҳхатҳо ба Бозиҳои олимпии Токио хоҳанд шуд.