Arrestohet deputeti Dardan Molliqaj
“Molliqaj është arrestuar nën arsyetimin për pjesëmarrje në protestën për lirimin e deputetit Albin Kurti, në vitin 2015”, është thënë në njoftimin e kësaj partie.
PSD konsideron se “arrestimi i deputetit Molliqaj ka qenë në kundërshtim me liritë dhe të drejtat e njeriut dhe në shkelje të plotë të procedurave ligjore”.
Ndërkohë Policia e Kosovës ka konfirmuar se ka realizuar një urdhër-arrest të Gjykatës Themelore në Prishtinë.
“Urdhër - arresti është nxjerrë me datën 12.05.2019, dhe në të janë specifikuar detyrimet, për policinë, që i pandehuri D.M, të dërgohet në Objektin e Pallatit të Drejtësisë, saktësisht në Prokurorinë Themelore. Aktualisht policia sipas rregullit po kryen të gjitha veprimet e nevojshme procedurale për të përmbushur plotësisht urdhëresën e gjykatës”, është thënë në njoftimin e Policisë së Kosovës.