بلخ کې د ښځو اعتراضيه غونډه؛ "د زده کړو او کار اختری ورکړئ"
په بلخ کې معترضې مېرمنې د لوی اختر د رارسېدو په درشل کې د طالبانو له حکومت څخه د کار او زده کړو د حقونو غوښتنه کوي.
د دې اعتراض هغه ويډيو چې له ازادي سره شریکه شوې، ښيي چې تر ۲۰ ډېرې ښځې په یوه حویلۍ کې راټولې شوي دي.
په دې ويډيو کې چې د ځینو مېرمنو چادرۍ هم پر سر دي، د "د زده کړو او کار اختری ورکړئ" شعارونه ورکوي.
د دې اعتراضيه ناستې په پای کې یو څلوره ماده يیز پرېکړه لیک هم صادرېږي چې د یوې ګډونوالې له خوا لوستل کېږي.
د پرېکړه لیک په يوه برخه کې راغلي: "موږ له سرپرست حکومت څخه هیله لرو، چې د خلکو د اساسي حقونو په ورکولو او د اوسنیو محدوديتونو په ختمولو سره ښځو ته د زده کړو او کار زمینې برابرې کړي او د اسلامي ارزښتونو په رڼا کې دې ښځو ته مناسب کاري او درسي چاپیریال رامنځته کړي."
د فریحې په نوم د دې اعتراضيه ناستې یوې ګډونوالې د خپلو غوښتنو په اړه ازادي راډيو ته وویل: "د زده کړو اختری راکړئ، موږ له دې ډېر له خپلو اساسي حقونو یعنې زده کړو او کار څخه مه محروموئ. زه په پوره باور وایم چې دا د ټولو افغان مېرمنو غوښتنه ده."
دې معترضو مېرمنو په خپل پرېکړهلیک کې له ملګرو ملتونو څخه ناخوښي ښودلې، چې د دوی په وینا د افغانستان ناوړه بشري وضعيت ته یې لازمه پاملرنه نه ده کړې.
خو له دې سره یې هم د ملګرو ملتونو له مرسته رسوونکو ادارو غوښتي چې د بشري مرستو په وېشلو کې دې بې وزلو په ځانګړې توګه کونډو ښځو، معلولانو او هغو کسانو ته چې په تېرو ۲ کلونو کې یې دندې له لاسه ورکړي، ډېر پام وکړي.
دا په داسې حال ده، چې د ملګرو ملتونو سازمان د افغانستان په اړه د څو غونډو جوړولو سربېره دوه ځلې خپل لوړ پوړي پلاوي هم دغه هېواد ته طالبانو سره خبرو ته لېږلي، خو طالبانو په خپلو کړنو کې کوم بدلون نه دى راويستى.
د دې اعتراض او د ښځو د غوښتنو په اړه مو د طالبانو حکومت د ویاند ذبیح الله مجاهد نظر هم وپوښت، خو نوموړي د دې راپور تر خپرېدو پورې زموږ پوښتنې ځواب نه کړې.
د طالبانو مشر ملا هبت الله اخندزاده د یکشنبې په ورځ په خپل اختریز پیغام کې ویلي وو، چې په افغانستان کې د ښځو ټول شرعي حقونه خوندي شوي، خو هغه یوازې د ودونو او میراث مسئلې ته اشاره کړې وه او د ښځو د کار او زده کړو په اړه یې هېڅ نه و ویلي.
طالبانو په افغانستان کې له بیاځلي واکمنېدو وروسته په نجونو او ښځو د ډېرو نورو محدوديتونو ترڅنګ هغوی له شپږم ټولګي پورته له ښوونځيو، پوهنتونونو او په دولتي او غیردولتي ادارو کې له کار څخه منع کړې.
دې محدوديتونو ته د پراخو نړيوالو او کورنیو غبرګونونو سره هم طالبانو دا محدوديتونه د افغانستان کورني مسایل بللي او د لرې کولو په خاطر یې هيڅ اقدام نه دی کړی.