روسي چارواکو له بلوا وروسته د وضعیت د عادي ښودلو هڅه کړې
په روسیه کې د وړمې ورځې له نږدې ۲۴ ساعته ګډوډۍ او بلوا وروسته روسي چارواکو نن هڅه کړې چې وضعیت بېرته عادي وښيي.
پلازمېنه مسکو کې نن دوشنبه د وضعیت د عادې کېدو په موخه رخصتي اعلان شوې او د مسکو ښاروال سرګي سوبیانین اعلان کړی، چې له بلوا وروسته د ترهګرۍ ضد اقدامات بېرته لغوه شوي دي.
سوبیانین پر خپل ټلېګرام چېنل لیکلي، چې د بلوا د مخنیوي لپاره ټول لګول شوي محدودیتونه له منځه ځي.
د روسیې د امنیت فدرال سرویس په جلا ډول په مسکو کې د ټولو لنډمهاله محدودیتونو د لغوې خبر ورکړی دی.
د روسیې د جنوب لوېدیځ ښار ورونیژ والي الکساندر ګوسف هم اعلان کړی، چې سیمه کې یې د واګنر ډلې د جنګیالیو له شاتګ وروسته ټول د ترهګرۍ ضد اقدامات لغوه شوي.
په مسکو او یو شمېر نورو سیمو کې د ترهګرۍ ضد اقدامات وروسته تر هغه پیل شول چې، د واګنر په نوم د اجیرو جنګیالیو زرګونه وسله والو د شنبې په ورځ وسله وال پاڅون پیل کړ.
د واګنر ډلې مشر ایفګیني پریګوژین د شنبې په ورځ د اوکراین سرحد ته نږدې د روستوف ښار یو لوی پوځي مرکز او ځینې سیمې په خپل کنټرول کې ونیولې او خپلو د ده په ټکو ۲۵ زره سرتېرو ته یې د مسکو په لور د مارش امر وکړ.
په همغې ورځ ناوخته د روسیې چارواکو د بلاروس په منځګړیتوب له پریګوژین سره د هوکړې خبر ورکړ او له هوکړې سره سم د مسکو په لور د واګنر وسله والو مارش هم و درېد.
په هوکړه کې راغلي، چې پریګوژین به بېلاروس ته لېږدول کېږي او ژوند به یې خوندي وي، خو د ازادي راډیو د خبر مرکزي څانګې لیکلي، تر نن پورې هم دا څرک نه لګېږي چې پریګوژین بېلاروس ته تللی او که نه.
د واګنر ډلې له وسله والې بلوا وروسته د روسیې ولسمشر ولادمیر پوتین پریګوژین په خیانت تورن کړ، خو د کریملین چارواکو ویلي، د هوکړې له مخې د هغه په ضد جنایي دوسیه لغوه شوې او د بلوا ګډونوال سرتېري به هم نه پوښتل کېږي.
د پریګوژین یوه غوښتنه د روسیې د دفاع د وزیر سرګي شویګو لرې کول و، خو د روسیې دفاع وزارت یوه تازه ویډيو خپره کړې چې شویګو په کې له خپل یوه همکار سره په الوتکه کې د پرواز پر مهال لیدل کېږي.
بل لورته ریا خبري اژانس راپور ورکړی، چې شویګو تازه له هغو سرتېرو سره کتلي چې اوکراین کې جنګېږي.
دغه راپور او د دفاع وزارت له خوا خپره شوې ویډیو لا خپلواکو سرچینو نه ده تایید کړې.
په روسیه کې که څه هم د واګنر ډلې پاڅون پای ته رسېدلی، خو د چارو کتونکي په دې باور د، چې دغې بلوا د روسیې د ځواکمن ولسمشر د څه باندې دو لسیزو واکمني وننګوله او د هغه دریځ یې کمزوری کړ.