سولې شورا: مسکو غونډه کې خبرو ته د طالبانو هڅول مو لومړیتوبونه دي
د سولې عالي شورا مرستیال او د مسکو په ناسته کې د ګډون کوونکي پلاوي مشر حاجي عزیزالله دین محمد نن ازادي راډیو ته وویل چې دوی به د مسکو د غونډې ګډونوالو ته د افغانستان د سولې د روان بهیر او اهمیت په اړه هم معلومات ورکړي.
نوموړی وايي:
"زموږ اجنډا او لویه خبره دا ده چې د دې لپاره زمینه برابره شي چې په افغانستان کې وینې توییدل بند شي او امن راشي. د دې کار لپاره به زموږ غوښتنه دا وي چې زموږ لوری او د طالبان لوری خبرو ته کینې او د مشکلاتو حل لاره را وباسي."
تمه ده د افغانستان د سولي په اړه د مسکو غونډه د نوومبر پر ۹مه نيټه ترسره شي.
افغان حکومت وایي، د افغانستان د سولې عالي شورا پلاوی به د یوه خپلواک بنسټ په توګه په دغه غونډه کې ګډون وکړي نه د حکومت په استازیتوب.
په همدې حال کې د ترکمنستان چارواکو د افغانستان د سولې د هڅو ستاینه کړې ده.
د ترکمنستان د بهرنیو چارو وزیر رشید مرادوف نن په کابل کې د افغان حکومت له اجرائیه رئیس عبدالله عبدالله سره د لیدو پرمهال د افغانانو په مالکیت او مشرۍ د سولې هڅو څخه ملاتړ وښود.