د افغانستان د ملي دفاع وزیر: حکومت ښايي په نږدې وخت کې بیا اوربند اعلان کړي
د افغانستان د ملي دفاع وزیر: حکومت ښايي په نږدې وخت کې بیا اوربند اعلان کړي.
طارق شاه بهرامي پرون چهارشنبه په پکتیا کې دا خبره وکړه او د دې ولایت پر سیمېزه اداره او امنیتي ځواکونو ږغ وکړ چې د حکومت د سولې د پروګرام د عملي کولو لپاره تیاري ولري. ښاغلي بهرامي ونه ویل چې اوربند دقیقاً ، بیا څه وخت اعلانېږي.
د افغانستان د دفاع او کورنیوچارو وزیران او دملي امنیت د عمومي ریاست مشر پرون په افغانستان کې د ناټو او د امریکايي ځواکونو له قوماندان، جنرال جان نېکلسن سره یوځاي پکتیا ته تللي ول.
جنرال جان نېکلسن پرون په پکتیا کې وویل چې نړیواله ټولنه په افغانستان کې د سولې لپاره له روانو هڅو ملاتړ کوي.