تايلنډ: په يوه سمڅه کې د راګېر شوېو هلکانو د ژغورنې ماموريت پيل شو
د چيانګ راى ولايت والي نارونګ-ساک اوسوتانا کورن چې د ژغورنې د روانو هڅو مشري کوي وويل:
"زه تائيدوم چې دغه ١٣ هلکان چې د هغوى روزونکى هم په کې شامل دى، له سمڅې د راوتلو لپاره له ښې روحيې برخمن دي. دغه ١٣ کسان زموږ له عملياتو خبر او له موږ سره له سمڅې راوتلو ته چمتو دي. پروا نه کوي که دوى له کومې ستونزې سره مخامخېږي. دوى خپل چمتووالى تاييد کړى او خپلوان يې هم خبر دي. له موږ سره يې پر دغو عملياتو موافقه کړې ده."
چارواکي وايي، د نړۍ له بېلابېلو برخو، تر ډېره له اروپا لامبووهونکي د ژغورنې په دغه ماموريت کې برخه لري.
له هر هلک سره به دوه لامبووهونکي له سمڅې په تدريجي راوتلو کې ملګرتيا کوي.
چارواکي وايي، دغه عمليات ښايي درې-څلور ورځې وخت ونيسي او تر ډېره د هوا په حالت پورې اړه لري.