د ازبکستان ولسمشر د کوچني اختر په درشل کې لسګونه بندیان وبخښل
د ولسمشر دغه حکم تېره ورځ شوی چې له مخې یې ۱۷۳ تنه بندیان له زندانونو خوشې کېږي.
په دې زندانیانو کې ۷۱ تنه یې په ضمانت خوشې کېږي.
پر دې سربېره ۳۹ بندیان به خفیف حبس ته انتقال شي او د ۱۴ نورو د حبس موده به راکمه شي.
د ازبکستان دولتي رسنیو راپور ورکړی چې د بخښل شوېو ۴۰ تنه یې تر ۶۰ کلونو ډېر عمر لرونکي دي، ۳۹ یې بهرنیان دي او ۳۷ نورې یې ښځینه بندیانې دي.
تر میرضیایف دمخه ولسمشر اسلام کریموف چې په ۲۰۱۶ میلادي کال کې مړ شو، هېڅکله د اختر په مناسبت بندیان نه وو بخښلي.
ازبکستان له ۳۰ میلیونه وګړو سره د منځنۍ اسیا په هېوادونو کې تر ټولو ډېر نفوس لري.