ცხინვალში კორონავირუსით ინფიცირების 5 ახალი შემთხვევა გამოვლინდა
10 მაისს, სამხრეთ ოსეთის დე ფაქტო რესპუბლიკაში კორონავირუსით ინფიცირების 5 ახალი შემთხვევა დაფიქსირდა. ამ ინფორმაციას სააგენტო „რესი“ აქვეყნებს.
მთავარი სანიტარიული ექიმის მოადგილის, ანა გაგლოევას თქმით, ამ დროისთვის სამხრეთ ოსეთში COVID-19-ით 22 ადამიანია ინფიცირებული. მისი განმარტებით, ყველა გადაყვანილია ცენტრალური საავადმყოფოს ინფექციურ განყოფილებაში და მათი მდგომარეობა სტაბილურია. 14 ინფიცირებული რუსეთის უმაღლესი სასწავლებლებიდან დაბრუნებული სტუდენტია. 7 მოქალაქე ვლადიკავკაზიდან ჩავიდა და ერთი სამხედრო მოსამსახურეა. გაგლოევას ინფორმაციით, ცხინვალის სამედიცინო დაწესებულებებსა და სასტუმრო „ალანში“, კარანტინში 276 ადამიანი იმყოფება, თვითიზოლაციაში კი - 43.
ოკუპირებულ ცხინვალის რეგიონში ახალი კორონავირუსით ინფიცირების შემთხვევები პირველად 6 მაისს გამოვლინდა.