ԱԺ-ում ՀԱԿ-ը և ԲՀԿ-ն պնդեցին՝ սխալ է լրջագույն նախագծեր քննարկել այն պահին, երբ պատգամավորները զբաղված են ՏԻՄ քարոզարշավով (ուղիղ)
Ազգային ժողովում մեկնարկել է կառավարության նախաձեռնությամբ հրավիրված արտահերթ նիստը: Օրակարգում առկա 22 հարցերից է նաև «Կառավարության կառուցվածքի մասին ՀՀ օրենքում փոփոխություն կատարելու մասին» նախագիծը:
«Հայ ազգային կոնգրես» խմբակցության ղեկավար Լևոն Զուրաբյանը վարման կարգով ձայն խնդրեց և նշեց, որ կառավարությունն այս արտահերթով ևս մեկ անգամ ցույց է տալիս, որ փոփոխությունների մասին խոսակցությունները դատարկություն են և այս վարչապետը մյուսների նման ևս խորհրդարանը դիտակում է որպես կամակատար, դակիչ մարմին:
«Եթե կար սահմանադրական պահանջ կառավարության ձևավորման, կարելի էր արտահերթ նիստ հրավիրել միայն այդ հարցով, ոչ թե 22 օրենքը ճխտել այս արտահերթի մեջ, ինչը թույլ չի տալիս պատշաճ քննարկում։ Առավել ևս, որ հոկտեմբերի 2-ին առջևում ՏԻՄ ընտրություններ են նաև Վանաձորում և Գյումրիում, և կուսակցությունները զբաղված են այդ ընտրարշավով: Իշխանավորները ցույց են տալիս, որ հարգանք չունեն ժողովրդավարության հիմնարար սկզբունքների նկատմամբ»,-ասաց նա։
ԱԺ նախագահ Գալուստ Սահակյանը նշեց, թե դա նրա կարծիքն է, խորհրդարանի մեծամասնությունը չի կիսում այդ կարծիքը:
«Ավելի լավ կլիներ՝ նայեիք օրինագծերը և միանգամից չէիք տարածի 22 հարց, սա կարճ տևող արտահերթ է, ՏԻՄ-ի հետ կապել չեմ կարծում, որ ճիշտ է»,-ասաց նա
«Բարգավաճ Հայաստան» կուսակցության ղեկավար Նաիրա Զոհրաբյանն էլ իր հերթին հայտարարեց, թե միանում է Զուրաբյանի հայտարարությանը:
«Եթե կառավարությունը խնդիր ունի հերթական անգամ վերաձևելու կառավարության կազմը, ինչ-որ մեկին նախարար նշանակելու համար, ինչ-որ մեկի համար կոմիտե ստեղծելու համար, կարելի էր այդ նախաձեռնությունը մենակ բերել՝ հաշվի առնելով ՏԻՄ ընտրություններին բոլոր խորհրդարանական քաղաքական ուժերն են մասնակցում և տխրահռչակ Հարկային օրենսգիրքը քննարկել այն պայմաններում, երբ պատգամավորները ներկա կլինեին: Սա անհարգալից վերաբերմունք է խորհրդարանի նկատմամբ: Ձևեք կառավարությունը ում վրա, ոնց ուզում եք, բայց մի բերեք լրջագույն նախագծեր քննարկել այն պահին, երբ պատգամավորները զբաղված են ՏԻՄ քարոզարշավով»,-ասաց նա:
Գալուստ Սահակյանը հակադարձեց, թե կանոնակարգ օրենքով է առաջնորդվել արտահերթ հրավիրելու համար և հիշեցրեց, որ առավել ևս, որ Հարկային օրենսգրքի մասին օրենքի քննարկմանը, այդքան եկար խոսելուց հետո, մեծ մասը չի մասնակցել:
«Եվ հետո ինչ է նշանակում ՏԻՄ ընտրություններ են գնում, ի՞նչ է առաջին անգամ է, խորհրդարանը պետք է չաշխատի , ինչ է ՏԻՄ ընտրություններ են»,-եզրափակեց նա: