Ճանաչել ԼՂ անկախությունը. Կայծ Մինասյանը հայ համայնքի պահանջների մասին՝ Ֆրանսիայի նախագահական ընտրություններին ընդառաջ
Ֆրանսիայում նախագահական ընտրություններին ընդառաջ հայ համայնքը պետք է որոշում կայացնի, թե ինչ պահանջատիրությամբ է հանդես գալու․ Tert.am-ի հետ զրույցում խոսելով 2017 թվականին Ֆրանսիայի նախագահական ընտրություններին հայ համայնքի ներգրավվածության և ազդեցության մասին՝ ասաց Ֆրանսիայի «Ռազմավարական հետազոտությունների կենտրոնի» փորձագետ Կայծ Մինասյանը:
«Դեռ պարզ չէ թե՛ ձախակողմյան, թե՛ աջակողմյան կուսակցություններից ինչ թեկնածուներ են առաջադրվելու, բայց գլխավոր թեկնածուների մասին արդեն գիտենք՝ Մարին Լե Պենն է՝ ծայրահեղ աջակողմյան քաղաքական ուժի կողմից: Հանրապետական կուսակցությունից դեռ պարզ չէ՝ Սարկոզին կլինի՞, թե ոչ: Օլանդի թեկնածություն դնելն էլ դեռ պարզ չէ, բայց նրանց մասին են շատ խոսում»,-ասաց նա:
Խոսելով հայ համայնքի համար կարևոր թեմաների մասին՝ նա նշեց, որ Ֆրանսիան արդեն ճանաչել է Հայոց ցեղասպանությունը, հիմա սպասվում է, որ Սենատը կընդունի Հայոց ցեղասպանության ժխտումը քրեականացնող նախագիծը:
«Եթե դա էլ ընդունվի, հայերը պետք է Ֆրանսիայից պահանջներ ունենան Լեռնային Ղարաբաղի ճանաչման վերաբերյալ: Ղարաբաղի դեպքում առաջնահերթություն է անկախության ճանաչումը, և շատ հավանական է, որ թեկնածուներն իրենց կեցվածքը ներկայացնեն ընտրապայքարի ընթացքում Ղարաբաղի անկախության վերաբերյալ»,- ասաց Կայծ Մինասյանը:
Նա այս համատեքստում նշեց, որ արդեն ընտրությունների նախաշեմին կուրվագծվի, թե ինչպիսին կլինեն Թուրքիա-Ֆրանսիա, Ֆրանսիա-Ռուսաստան-Թուրքիա հարաբերությունները։
«Այդ երկուսն ազդեցություն կունենան նաև ֆրանսահայ գաղութի և հայկական հարցերի վրա»,- ասաց նա:
Կայծ Մինասյանը ներկայացրեց, որ Ֆրանսիայում գործում են 3 քաղաքական դպրոցներ՝ իշխանական, դը Գոլի ժառանգորդների և նեոպահպանողական:
«Առաջինի հետևորդները դեմ են, որ Թուրքիան մտնի Եվրամիություն, ազգային փոքրամասնություններին կարևորություն չեն տալիս, երկրորդի դեպքում՝ կարևորվում է Թուրքիայի հետ հարաբերությունների զարգացումը, նաև՝ ցանկանում են բոլոր պետությունների հետ լավ ունենալ: Երրորդի դեպքում՝ կարևոր է բոլոր փոքր պետությունների հետ լավ հարաբերություններ ունենալը: Կարևորն այն է, որ հայ համայնքը, այս ամենը հաշվի առնելով, իր հարաբերությունները կառուցի այդ դպրոցների քաղաքական ուժերի հետ»,-ասաց նա:
Նա մատնանշեց թեկնածուների նախասիրությունները: «Ձախակողմյան քաղաքական ուժի կողմից Ֆրանսուա Օլանդը միշտ շեշտը կդնի Ցեղասպանության հարցի վրա և կմասնակցի Ղարաբաղյան կոնֆլիկտի կարգավորման գործընթացին: Նա ցանկանում է խաղաղություն պահպանել հայերի և ադրբեջանցիների միջև: Այդ հավասարակշռությունը մի փոքր վտանգավոր է հայերի համար: Թուրքիայի հետ հարաբերություններ պահելը կարևոր է Ֆրանսիայի համար: Իր ժամանակաշրջանի մեջ Ֆրանսուա Օլանդը նոր բաժին բացեց Թուրքիայի և Եվրոպական միության հարաբերությունների միջև»,-ասաց նա:
Խոսելով աջակողմյան ուժերից թեկնածու Մարին Լը Պեննի մասին՝ Կայծ Մինասյանը նշեց, որ նա դեմ է Թուրքիայի անդամակցությանը Եվրամիությանը:
«Հաշվի առնելով, որ նա դեմ է Ֆրանսիայում ազգային փոքրամասնությունների գոյությանը, կարող ենք ասել, որ նա հետաքրքրված չի լինի հայկական հարցերով: Ղարաբաղի հարցով նա ոչինչ չի ասում: Նա շատ-շատ ռուսամետ է և արդեն իր ընտրապայքարի համար դիմել է ռուսական բանկին, որ գումար վերցնի»,- ասաց նա:
Ըստ Կայծ Մինասյանի՝ հանրապետականներից Սարկոզին է բավական հայամետ և թուրքերի հետ լավ հարաբերություններ չունի։
«Պրո-ռուսական կողմնորոշում ունի, բայց Ղարաբաղի հարցում էլ, չգիտենք, թե ինչ է մտածում, բայց ինքը, շատ հավանական է, որ հավասարակշռություն կպահի Հայաստանի և Ադրբեջանի միջև»,- ասաց նա՝ ավելացնելով, որ մյուս թեկնածուն, որի մասին խոսում են, Ալան Ժուպենն է, որը ճանաչված է որպես պրո-թուրքական գործիչ։
«Բայց վերջին շրջանում նա էլ է հայտարարել, որ Թուրքիան չի կարող լինել Եվրամիության անդամ: Ինքը ազգային փոքրամասնություններին դեմ է: Ղարաբաղի ինքնորոշման հարցին բավականին լուրջ է վերաբերում, բայց չգիտենք իր կեցվածքը Ղարաբաղի վերաբերյալ»,-ասաց նա։
Ըստ Կայծ Մինասյանի՝ նախագահական ընտրություններին ընդառաջ հայ համայնքը ինչ-որ քայլեր արդեն անում է՝ իր հետաքրքրություններն առաջ տանելու ուղղությամբ։
«Հայ հեղափոխական կուսակցությունն է մտերիմ Ֆրանսուա Օլանդի հետ: Նշաններ կան, և շատ հավանական է, որ Դաշնակցությունը կհետևի ընտրական գործընթացին»,- ասաց նա՝ համոզված լինելով, որ հայ համայնքը կարող է ազդեցություն ունենալ Ֆրանսիայում սպասվող նախագահական գործընթացների վրա:
«Հայերի ռազմավարությունը պետք է լինի՝ պատրաստ ենք օգնելու այն թեկնածուին, որը պետք է ճանաչի Լեռնային Ղարաբաղի անկախությունը՝ թե ընտրապայքարից առաջ, և թե ընտրապայքարի վերջում: Խոստումը կարևոր է»,- ասաց նա։