ՆԱՏՕ-ի ներկայությունը Թուրքիայում ընդլայնելը կապված է Սիրիայում հումանիտար շարասյան ռմբակոծության հետ. Մանվել Սարգսյան
Ռազմավարական և ազգային հետազոտությունների հայկական կենտրոնի տնօրեն Մանվել Սարգսյանը Tert.am-ի հետ զրույցում անդրադարձավ ՆԱՏՕ-ի գլխավոր քարտուղար Յենս Սթոլթենբերգի այն հայտարարությանը, ըստ որի՝ ՆԱՏՕ-ն ուժեղացրել է իր ներկայությունը Թուրքիայում:
«Ես կարծում եմ, որ ՆԱՏՕ-ի ներկայությունը Թուրքիայում ընդլայնելը պայմանավորված է Սիրիայում հումանիտար շարասյան ռմբակոծության հետ, որը պատկանում էր Միացյալ ազգերի կազմակերպությանը և միջազգային կարմիր խաչին: Հիմա գնալով փորձում են Ռուսաստանին և Ասադի ռեժիմին մեղադրել դրանում, ինչը լրջագույն միջադեպ է»,- ասաց նա և նշեց իրականում կարելի է ասել, որ ոչ թե ընդլայնում է իր ներկայությունը, այլ վերականգնում է:
Մանվել Սարգսյանը տրամաբանական համարեց այդ հայտարարությունը, քանի որ վերջին ամիսները Թուրքիան փորձում էր իր հարաբերությունները հստակեցնել Ռուսաստանի հետ: «Դրանից հետո, ըստ երևույթին, եղան ինչ-որ պայմանավորվածություններ և էական բաներ փոխեցին, սակայն պարզ չէ, թե ինչ են պայմանավորվել, ինչ է եղել: Տպավորություն կա, որ Ռուսաստանի նախագահը և Էրդողանը պայմանավորվել են այլ հարաբերություններ ստեղծել Սիրիայի տարածքում, սակայն թուրքերը շատ զգուշավոր են և պարզ չէ, թե ինչպես կարող է գործընթացը զարգանալ Սիրիայում»,- ասաց նա:
Մանվել Սարգսյանը նշեց, որ շատերի համար անհասկանալի է, թե ինչ նոր դիրքորոշումներ են ընդունում գերտերությունները: «Բնական է, որ Թուրքիան պետք է խնդրեր ՆԱՏՕ-ին, որ ապահովի իր օդային տարածքը, առավելևս, որ ՆԱՏՕ-ի գլխավոր քարտուղարը նշել է, որ հակաօդային և հակահրթիռային պաշտպանության մասին է խոսքը»,- ասաց նա:
ՌԱՀԿ տնօրենը նկատեց, որ ՆԱՏՕ-ի քայլերը Թուրքիայում դադար ստացավ, երբ Թուրքիայի և Արևմուտքի հարաբերությունները կտրուկ վատացան, իսկ հիմա կարծես նոր վիճակ է ստեղծվել, երբ Թուրքիան կարող է վերականգնել իր հարաբերությունները:
Ըստ նրա՝ Թուրքիան կարողանում է պահել հավասարակշռությունը Արևմուտքի և Ռուսաստանի հետ: «Թուրքիան ցանկանում էր ուժի դիրքերից խոսել բոլորի հետ՝ Արևմուտքի, Ամերիկայի, Ռուսաստանի հետ, սակայն կյանքը ցույց տվեց, որ դա հեշտ բան չի և Թուրքիան խորը ճգնաժամի և մեկուսացման մեջ հայտնվեց»,-ասաց նա:
Հարցին, թե ըստ Ձեզ հնարավոր է հակազդելու համար ՀԱՊԿ-ը իր ներկայությունն ավելի ընդլայնի Հայաստանում, Մանվել Սարգսյանն ասաց, չի կարծում, որ ՀԱՊԿ-ը նոր հարց բարձրացնի, սակայն, գտնում է, որ այսօր բոլոր երկրներին երաշխիքներ են պետք: