Ոչ բոլոր բարձրագույն ղեկավարություններն են ցանկանում պատշաճ ձևով աշխատել․ միջազգային ներքին աուդիտոր
Ես արդեն 3 օր է՝ այստեղ եմ, հանդիպել եմ տարբեր երկրների, կազմակերպությունների մարդկանց հետ, նրանք բոլորը շատ խելացի են, նրանց մոտեցումը և մտածելու եղանակը այնպիսին է, ինչպիսին դու սպասում ես ժամանակակից աուդիտորից․ Հայաստանի ներքին աուդիտորների ինստիտուտի միջազգային 2-րդ կոնֆերանսի ժամանակ, Tert.am-ի հետ զրույցում խոսելով կորպորատիվ կառավարման և ներքին աուդիտորների աշխատաոճի մասին, նկատեց European Institute for Audit Professionals-ի տնօրեն, Նիդեռլանդների բանկի ներքին աուդիտոր Ռոբերտ Քորնելիսը:
«Բայց, ինչպես շատ երկրներում, այնպես էլ Հայաստանում՝ ոչ բոլոր բարձրագույն ղեկավարություններն են ցանկանում պատշաճ մակարդակով անդրադառնալ զսպման և հավասարակշռման մեխանիզմներին: Նրանք պետք է ցույց տան դա անելու ցանկությունը։ Ոչ միայն Հայաստանում, այլ նաև ուրիշ երկրների շատ կազմակերպություններում կարծում են, որ իրենք գտնվում են առանձին մակարդակի վրա․ նրանց թվում է, որ իրենք բարձր են և կարող են ունենալ իրենց առանձին մշակույթը»,- ասաց նա:
Ռոբերտ Քորնելիսը Հայաստանում անցկացվող միջազգային կոնֆերանսին դասախոսություն է կարդացել «Ներքին աուդիտի դերը կորպորատիվ կառավարման ժամանակ» թեմայով․ նա նշեց, որ եթե թեման օրակարգում է, նշանակում է, որ արդեն այս ոլորտում դրական փոփոխություններ կան. «Բայց խնդիրն այն է, կորպորատիվ կառավարման տեսակյունից, ներքին աուդիտի կամ կառավարման ստորաբաժանումները մի փոքր ավելի քիչ են հասուն, քան բիզնես կառավարմամբ զբաղվող կառույցները: Մասամբ դա տրամաբանական է, հետևաբար, կարծում եմ, որ կառավարիչների և ներքին աուդիտով զբաղվող անձանց դերը պետք է լինի նաև նրանց երկուսին կրթելը, որովհետև, ըստ իս, այնպիսի հասկացությունները, ինչպիսիք ասենք աուդիտորական հանձնաժողովներն են, լրիվ նոր են Հայաստանի նման երկրի համար»:
Նա նկատեց, որ ներքին աուդիտի համակարգը Հայաստանում նոր է զարգանում, այդ պատճառով է, որ դրա կարևորության մասին շատ կազմակերպություններ չեն մտածում: Նշեց, որ եթե ընկերությունների ղեկավարները նոր մտածելակերպի տեր մարդիկ են լինում, ձգտում են զարգացնել իրենց ներքին աուդիտը․«Բաժնետերերը պետք է շահագրգռված լինեն այդ հարցում, որովհետև նրանք պատասխանատու են ընկերության խորհրդի առաջ: Ամենամեծ մարտահրավերն իմ կարծիքով այն է, որ յուրաքանչյուր աուդիտոր, ինչպես նաև գլխավոր աուդիտորները պետք է կարողանան գտնել ճիշտ հավասարակշռման եղանակը և այն պահեն իրենց օրակարգում»: