Կարեն Կարապետյանը Մոսկվայի ոճն ավելի լավ է հասկանում․ Սերգեյ Մինասյան
Ըստ «Կովկասի ինստիտուտի» փոխտնօրեն, քաղաքագետ Սերգեյ Մինասյանի՝ Երևանի նախկին քաղաքապետ, «Գազպրոմում» բարձր պաշտոն զբաղեցրած Կարեն Կարապետյանին վարչապետի պաշտոնում նշանակելու փաստի մեջ կարևոր հանգամանքն այն չէ, որ նա Ռուսաստանից է գալիս: Նա նաև որևէ ձևով չի բացառում, որ Հայաստանում կառավարության փոփոխությունը կարող է պայմանավորված լինել աշխարհաքաղաքական իրադարձություններով:
«Երկրում կատարված վերջին իրադարձություններից հետո և երկրում ստեղծված սոցիալ-տնտեսական և հասարակական-քաղաքական իրավիճակից ելնելով՝ երկրի նախագահը հասկացավ, որ եթե ինչ-որ մի բան ընդհանրապես կարելի է անել, դա կարող է լինել խորը բարեփոխումների միջոցով: Եվ բարեփոխումները պետք է անել ոչ թե ներսից մարդ նշանակելով, ինչպես եղավ Հովիկ Աբրահամյանի դեպքում, այլ բերելով համակարգից դուրս մեկին, իսկ Կարեն Կարապետյանը, իհարկե ունենալով և՛ անձնական, և՛բարեկամական, և՛ աշխատանքային կապեր Հայաստանում, ընկալվում է որպես այս համակարգից դուրս մարդ»,– ասաց Սերգեյ Մինասյանը:
Նա բերեց Ռուսաստանում կիրառված օրինակը, երբ ժամանակին պաշտպանության նախարար նշանակվեց Անատոլի Սերդյուկովը, որը պաշտպանական համակարգի հետ կապ չուներ: «Արդյունքում հնարավորություն եղավ բավականին բարեկարգել զինվորական համակարգը: Հիմա այս պահին տեսնում ենք, որ Ռուսաստանն ունի բավականին արդիականացված ռազմական համակարգ»,-ասաց Սերգեյ Մինասյանը՝ միաժամանակ նշելով, որ իր համար այս ամենում առավել կարևոր է, թե ինչ աստիճանի «քարտ բլանշ» է ստացել Կարեն Կարապետյանը Նախագահ Սերժ Սարգսյանից, թե ինչ աստիճանի ազատություն նա կունենա:
«Ճիշտ է, այդ ազատությունը տարբեր կերպ է ընկալվում իշխանությունների և հասարակության կողմից. իշխանություններն ասում են, որ խորը փոփոխություններ կանեն, բայց դրանք հնարավոր է՝ ընդհանրապես չհամապատասխանեն հասարակական սպասումներին: Չնայած կան շատ լավատեսական սպասումներ, բայց ես համոզված եմ՝ հասարակության ներսում նորից կլինեն խորը հիասթափություններ, և ոչ թե Կարեն Կարապետյանի պաշտոնավարման պատճառով, այլ որովհետև այդ բարեփոխումների խորությունները և նոր կառավարության հնարավորությունները չեն համընկնելու հասարակության պատկերացումներին»,- ասաց քաղաքագետը:
Անդրադառնալով այն դիտարկումներին, թե Ռուսաստանում լուրջ կապեր ունեցող մեկին վարչապետի պաշտոնում նշանակելով ռուսական ազդեցությունը Հայաստանում կավելանա, Սերգեյ Մինասյանը նշեց, թե Կարեն Կարապետյանին վարչապետի պաշտոնում նշանակելով ռուսական ազդեցության մեծացման խնդիր չկա:
«Ազդեցությունն ու կախվածությունն առավել շատ անվտանգության հարցերի հետ է կապված: Այդ առումով, չեմ կարծում, որ Հովիկ Աբրահամյանի ժամանակ, իր ներկայությամբ, այդ ազդեցությունը սահմանափակվում էր, և հիմա Կարեն Կարապետյանի դեպքում դա կավելանա: Հակառակը եթե հաշվի առնենք, որ նոր վարչապետը և՛ լավ ռուսերեն գիտի, և՛ անձնական կապեր էլ ունի, գուցե իր գործունեության ազատությունն ավելի շատ լինի ռուսների հետ, քան Հովիկ Աբրահամյանի ժամանակ էր: Կարեն Կարապետյանը Մոսկվայի ոճն ավելի լավ է հասկանում, քան Հայաստանի քաղաքական կամ տնտեսականը վերնախավը»,– ասաց քաղաքագետը:
Սերգեյ Մինասյանին հիշեցրեինք, որ նախկինում Կարեն Կարապետյանը հրաժարական տվեց քաղաքապետի պաշտոնից՝ պատճառաբանելով, թե իրեն ավելի բարձր աշխատավարձ են առաջարկել Մոսկվայում: Հարցին, թե արդյոք հաշվի չի առնվել Կարեն Կարապետյանի այն ժամանակվա արածը՝ այս անգամ նրան պաշտոն առաջարկելիս, Սերգեյ Մինասյանը պատասխանեց.
«Ես չեմ կարող բացառել, որ նա նույն կերպ չի վարվի կամ պնդեմ հակառակը: Բայց պետք է ենթադրել, որ այս պահին այդքան լուրջ քայլի գնալով ՝ Սերժ Սարգսյանը բոլոր հնարավոր սցենարները հաշվի է առել՝ նկատի ունենալով պահի լրջությունը: Հասկանալի է, որ իր համար կարևոր և լուրջ քայլ է լինելու: Կարծում եմ, որ Կարեն Կարապետյանի և Սերժ Սարգսյանի մոտեցումները նույնն են, որ գոնե մինչ 2018 թվականի մարտի ընտրությունները՝ մինչև գործող նախագահի լիազորությունների ավարտը, ինքը փորձելու է մնալ վարչապետի պաշտոնում: Կարեն Կարապետյանը պատրաստվում է այդ պաշտոնում գոնե տարի-տարիուկես մնալ, իսկ դրանից հետո թե ինչ կլինի, ոչ ոք չի կարող կանխատեսել»: