Կառավարության փոփոխությունը սպասելի էր՝ ընտրություններից առաջ ծխածածկույթ տարածելու համար. Արմեն Մարտիրոսյան
«Ժառանգություն» կուսակցության փոխնախագահ Արմեն Մարտիրոսյանի համար կառավարության փոփոխությունը սպասելի էր, որը արվեց ընտրություններից առաջ ծխածածկույթ տարածելու համար:
«Որովհետև Սասնա ծռերից հետո սկսած բողոքի ալիքը և հասարակության ներսում տեղի ունեցող խմորումները, բնականաբար, իշխանություններին պետք է ստիպեին քայլեր կատարել գոնե մինչև 2017թ-ի խորհրդարանական ընտրությունները մի փոքր ծխածածկույթ տարածելու համար, որպեսզի ժողովրդի մոտ արդարացնեն, թե տեսեք՝ փոխում ենք, մենք էլ ենք դժգոհ, որպեսզի հետագայում իրենց իշխանավարումը շարունակեն»,-Tert.am-ի հետ զրույցում ասաց Մարտիրոսյանը:
Ըստ նրա՝ այդուհանդերձ հայտարարված ազգային համաձայնության իշխանությունը որևէ կապ չունի երկրի ու ժողովրդի օրակարգի հետ:
«Նախ, մեզ այս պահին ոչ թե պետք է ազգային համաձայնության կառավարություն, այլ ժողովրդի վստահության կառավարություն, որովհետև ազգային համաձայնությունը մի փոքր այլ է։ Այս դեպքում եթե իրենք իրենցով կառավարություն են ձևավորելու, դա, բնականաբար, ինչպես նախկինում, ժողովրդի խնդիրների, պետության շահերի հետ կապ չի ունեցել, նույնկերպ էլ շարունակվելու է»,-ասաց նա:
Արմեն Մարտիրոսյանն անդրադարձավ Հովիկ Աբրահամյանի հրաժարականից հետո նախկին քաղաքապետ, «Գազպրոմ Մեժրեգիոնգազ» ընկերության գլխավոր տնօրեն Կարեն Կարապետյանի՝ վարչապետի պաշտոնում հնարավոր նշանակմանը և նշեց, թե նա «բնականաբար այն անձը չէ, ով կապ ունի պետության ու ժողովրդի հետ:
«Ինքը ՀՀ-ի ամենախոշոր փոշեծծիչ կառույցի ղեկավարն է եղել, կառույց, որը ՀՀ-ից անընդհատ գերշահույթներ է ստացել։ Մենք անընդհատ հայտնվում ենք Գազպրոմի հետ հարցերում խնդիրների մեջ, և այդ առումով որևէ նորություն չկա»,-ասաց նա:
Ըստ նրա՝ քաղաքապետ լինելու ժամանակ էլ Կարեն Կարապետյանը, որքան էլ լավ կազմակերպիչ է, խոշոր հաշվով որևէ ֆունդամենտալ բան չի փոխել, դեռ մի բան էլ կրպակներն է ապամոնտաժել, դրանով ընդամենը նպաստելով հարակից սուպերմարկետների թվի մեծացմանը և մի քանի ընտանիքի արտագաղթին:
«Ակնհայտ է, որ նա համակարգի ներսի մարդկանցից է, իսկ այդ դեպքում դժվար թե ինչ-որ բարեփոխում իրականացվի։ Առավել ևս, որ ինքը ոչ ԱԺ-ում մեծամասնություն ունի, ոչ էլ այդ առումով քաղաքական լծակ, այնպես որ բարեփոխումների մասին ևս մեկ պատճառ մոռանալու»,-ասաց նա և անդրադարձավ, ըստ իրեն, ամենամեծ «վտանգավոր» խնդրին:
«Ըստ էության եթե Կարեն Կարապետյանը նշանակվի՝ կդառնա գուբերնատորի նշանակում: ՀՀ-ն ամբողջությամբ ռուսական ենթակայության տակ են ուզում պահել, և եթե ՀՕՊ-ը հանձնեցին որպես ռուսական հարավային օկրուգի պաշտպանություն, այս դեպքում էլ ՀՀ-ն հանձնում են Գազպրոմին: Ակնհայտ է, որ գալով Հայաստան՝ Կարեն Կարապետյանը պետք է ռուսական քաղաքական ճյուղը ուժեղացնի և պետք է փորձեն այնպիսի մի խորհրդարան ձևավորել, որը ներկա խորհրդարանի նման ցանկացած ռուսական օրինագծի հայտարարության, որոշման կողմ կքվեարկի, առանց բացառության, հնարավոր է՝ ինչ-որ պահի Հայաստանն ընդգրկելով նաև Ռուսաստանի կազմի մեջ»,-ասաց նա:
Իսկ թե հնարավոր համարո՞ւմ է, որ ընդդիմադիր գործիչներ ևս ընդգրկվեն նոր կառավարության կազմում, Արմեն Մարտիրոսյանը պատասխանեց, թե նայած ընդդիմություն ասելով՝ ում են հասկանում:
«Եթե այն ուժերին նկատի ունեք, որ մինչև հիմա եղել են կառավարության կազմում, իհարկե կլինեն, չեմ կարող բացառել։ Բայց իրականության մեջ դա պետության ու ժողովրդի օրակարգի հետ բացարձակ կապ չունի, անունն ինչ ուզում են դնեն։ Եթե իմ անունը հիմա դնեք Բահրամնի սուլթան, պարզ է, որ սուլթան չեմ կարող դառնալ»,-ասաց նա: