«Արցախը երբեք չի լինելու Ադրբեջանի կազմում». ԱԺ փոխնախագահ
Աշխատանքային այցով Ուրուգվայում գտնվող ՀՀ ԱԺ փոխնախագահ, Հայաստան-Ուրուգվայ պատգամավորական բարեկամական խմբի ղեկավար Էդուարդ Շարմազանովի գլխավորած պատվիրակությունը, որի կազմում են ԱԺ պատգամավորներ Սուքիաս Ավետիսյանը և Միքայել Մանուկյանը, սեպտեմբերի 7-ին համատեղ հանդիպում է ունեցել Ուրուգվայի Արևելյան Հանրապետության Ներկայացուցիչների պալատի արտաքին հարաբերությունների հանձնաժողովի և Ուրուգվայ-Հայաստան պատգամավորական բարեկամության խմբի անդամների հետ. տեղեկացնում է ՀՀ ԱԺ հասարակայնության և տեղեկատվության միջոցների հետ կապերի վարչությունը։
Կողմերը կարևորել են Միջխորհրդարանական միությունում միմյանց սատարելու անհրաժեշտությունը: Հայկական պատվիրակության անդամները պատրաստակամություն են հայտնել հետայսու ևս նպաստելու երկու երկրների միջխորհրդարանական կապերի ամրապնդմանն ու զարգացմանը:
Անդրադառնալով ԼՂ հակամարտությանը՝ Էդուարդ Շարմազանովը նշել է, որ Արցախը երբեք չի լինելու Ադրբեջանի կազմում: Նա արձանագրել է, որ Ադրբեջանը նույնիսկ չի հանդուրժում իր տարածքում հայկական հազարամյա մշակութային ժառանգության գոյությունը: Սրա վառ ապացույցն ԱԺ փոխնախագահի դիտարկմամբ՝ նախկինում հայերով բնակեցված և այսօր արդեն հայաթափված Նախիջևանում Ջուղայի տասնյակ հազարավոր խաչքարերի ոչնչացումն էր:
Ուրուգվայի Ներկայացուցիչների պալատի անդամ Ռուբեն Մարտինեզ Հուելմոն իր հերթին նշել է, որ հարկավոր է սատար կանգնել Արցախի ժողովրդի ինքնորոշման իրավունքի իրացմանը: Հայկական պատվիրակության անդամներն իրենց երախտագիտությունն են հայտնել ուրուգվայցի խորհրդարանականին՝ 2013 թվականին Արցախ այցելելու և այսօր էլ բարոյական բարձր նկարագիր ունենալու համար:
Հանդիպմանն անդրադարձ է եղել նաև Հայոց ցեղասպանության միջազգային ճանաչմանն ու դատապարտմանը: Ուրուգվայական կողմն ընդգծել է, որ ողջ աշխարհը պետք է դատապարտի Հայոց ցեղասպանությունը: