Ինչու «ցար» Պուտինը հաշտվեց «սուլթան» Էրդողանի հետ. ավստրիական պարբերականի անդրադարձը
Վերջերս տեղի ունեցած պետական հեղաշրջման չստացված փորձից հետո Թուրքիան ու Ռուսաստանը փորձում են նորոգել իրենց հարաբերությունները. գրում է ավստրիական Die Presse պարբերականը։
«Վերջին օրերին Թուրքիայում ձերբակալված հազարավոր անձանց մեջ են նաև այն 2 օդաչուները, ովքեր, ենթադրաբար, թուրք-սիրիական սահմանի մոտ ամիսներ առաջ խոցել են «Սու-24» ռուսական կործանիչը: Նրանք Անկարայի կողմից մեղադրվում են պետական հեղաշրջման փորձում ներգրավված լինելու համար:
Ենթադրյալ դավաճաններից ազատվելու հետ մեկտեղ նախագահ Էրդողանը հույսեր է փայփայում վերջնականապես կարգավորել թուրք-ռուսական տարաձայնությունները: Մինչդեռ Մոսկվան Էրդողանի նմանօրինակ քայլերին շատ դրական է վերաբերվում»,- Die Presse պարբերականի թղթակից Յուտա Զոմերհաուերի հոդվածն է մեջբերում InoPressa-ն։
Հեղինակը նկատում է, որ ներկայիս իրականությունում Էրդողանն ու Պուտինը, ովքեր իրենց երկրներում ամենակարող ղեկավարներ են, թշնամիներից վերածվել են ընկերների:
«Եվ հիմա` Թուրքիայում պետական հեղաշրջման փորձի տապալումից հետո, այս երկուսի միջև տիրում է ընկերություն և համաձայնություն` չնայած հայտնի չէ, թե այս ներդաշնակությունը դեռ որքան կշարունակվի»,-գրում է հոդվածագիրը` հավելելով, որ ստեղծված իրավիճակը զավեշտալի է այնքանով, որ նախկին մի քանի ամիսների ընթացքում Ռուսաստանը, օգտագործելով բոլոր լծակները, ամեն կերպ վարկաբեկում էր Էրդողանին` նրան ներկայացնելով որպես իսլամիստների հովանավոր ու անկանխատեսելի օսմանյան սուլթան:
«Հաշվի առնելով այս ամեն` տարօրինակ է, որ հուլիսի 16-ին տեղի ունեցած դեպքերից հետո, երբ եվրոպական պետությունների ղեկավարները զերծ մնացին Թուրքիային իրենց համերաշխությունը հայտնելուց, Պուտինն առաջինն էր, ով բացեիբաց իր աջակցությունը հայտնեց Էրդողանին:
Եվ եթե Եվրոպան կոչ է անում Անկարային հավատարիմ մնալ իրավական պետության նորմերին, ապա Կրեմլն այս հարցում լռություն է պահպանում: Ընդհանրապես` հարկ եղած դեպքում Մոսկվան հեշտությամբ խախտում է միջազգային օրենքի նորմները»,-շարունակում է Զոմերհաուերը, ում կարծիքով, Պուտինին այժմ շատ ձեռնտու է այն իրավիճակը, որում հայտնվել է իր թուրք գործընկերը:
Հեղինակը ենթադրում է, որ մոտ ժամանակները Էրդողանը զբաղված է լինելու ներքին ճգնաժամի լուծմամբ, ինչի արդյունքում նրա տրածաշրջանային հավակնությունները կմղվեն 2-րդ պլան` թույլ տալով Ռուսաստանին ավելի հզորացնել իր դիրքերը Սիրիայում:
«Ըստ ամենայնի, Պուտինը կշարունակի անտարբեր մնալ այն ամենի հանդեպ, ինչն Էրդողանն անում է սեփական երկրի ներսում: Պուտինն ինքը թույլ չի տալիս, որպեսզի իր ներքին հարցերում որևէ արտաքին միջամտություն լինի: Իսկ այս հարցում «ցար» Պուտինն ու «սուլթան» Էրդողանը համապատասխանում են իրենց պատմական կերպարներին»,-եզրափակում է հեղինակը: