Վ. Սարգսյանի անվան ռազմական համալսարանի շրջանավարտների կազմում 5 աղջիկ սպա կա
Հուլիսի 20-ին ՀՀ ՊՆ Վազգեն Սարգսյանի անվան ռազմական համալսարանում ՀՀ Պաշտպանության նախարարի առաջին տեղակալ Դավիթ Տոնոյանը մասնակցել է 2016 թ. շրջանավարտների համար ծառայության վայրերի ընտրության վիճակահանությանը. տեղեկացնում է ՀՀ պաշտպանության նախարարության տեղեկատվության և հասարակայնության հետ կապերի վարչությունը։
Ընդունված կարգի համաձայն՝ կուրսանտները վիճակահանության միջոցով ընտրել են այն զորամասերը, որտեղ պետք է շարունակեն իրենց ծառայությունը: Արտոնություններ ունեցող մի շարք շրջանավարտներ էլ հնարավորություն են ստացել հետագա ծառայության վայրերն ընտրել առանց վիճակահանության: Նրանցից շատերը որոշում են կայացրել, հետագա ծառայությունը շարունակել այնպիսի զորամասերում, որոնք ներգրավված են մարտական հերթապահություններում: Ի դեպ, այս տարի ռազմական համալսարանն ավարտողների կազմում կա 5 աղջիկ սպա: Աղջիկներից երկուսը նույնպես իրենց ապագա ծառայությունը շարունակելու են մարտական հերթապահություն իրականացնող զորամասերում: