Քաղաքականություն մտնելու մտադրությունից չեմ հրաժարվել, ու որևէ մեկը չի կարող ինձ այդ հարցում խանգարել. Արա Աբրահամյան
Ռուսաստանի հայերի միության նախագահ Արա Աբրահամյանը հավաստիացնում է, որ ինքը քաղաքականություն մտնելու մտադրությունից չի հրաժարվել, պարզապես հիմա զբաղված է Երևանում ամենամյա Եվրասիական տնտեսական ֆորում անցկացնելու կազմակերպչական հարցերով: Այսօր լրագրողների հետ զրույցում Աբրահամյանն ամեն կերպ փորձում էր շրջանցել հաջորդ խորհրդարանական ընտրություններին վերաբերող հարցերը, բայց, այնուամենայնիվ, նշեց, որ ինքն այդ հարցին կանդրադառնա: Իսկ քաղաքականություն մտնելու իր մտադրությանը՝ «չի կարող խանգարել որևէ մեկը»:
- Պարոն Աբրահամյան, ի՞նչ եղավ քաղաքականություն մտնելու մասին Ձեր հայտարարությունը: Ուժի մե՞ջ է:
- Մենք մեր ծրագիրն իրականացնում ենք: Մենք ստեղծում ենք շարժում, որն անելու է այս մեկ, երկու, երեք, չորս քայլերը... Նայեք, ստեղծեցինք ինֆորմացիոն կենտրոն, այս շարժումը ստեղծեցինք, ծրագիր:
- Ինչի՞ եք հասնելու դրանով:
- Բա չլսեցի՞ք: Մենք ամեն տարի անցկացնելու ենք ԵՏՄ ֆորում, որին քիչ է մնացել, համբերեք, կտեսնեք՝ ինչ դեր ու նշանակություն կունենա:
- Խորհրդարանական ընտրություններին մասնակցելո՞ւ եք:
- Ես այդ հարցին մի քիչ ուշ կպատասխանեմ:
- Նախկինում ասել էիք, որ գուցե Ձեր կուսակցության ստեղծման համար խոչընդոտներ լինեն: Կա՞ն խոչընդոտներ:
- Ես երբեք այդպիսի բաներ չեմ ասել:
- Ո՞ր ուժերի հետ եք պատկերացնում համագործակցությունը:
- Բոլոր նրանց հետ, ովքեր համաձայն են մեզ հետ գործակցել, մեր դռները բաց են:
- Ռուսաստան-Թուրքիա հարաբերությունների լավացմանն ինչպե՞ս եք վերաբերում:
- Ռուսաստանը մեր ռազմավարական, քաղաքական գործընկերն է: Եթե մի պետության հետ լավ լինեն, մենք կարող ենք Ռուսաստանի միջոցով մեր խնդիրները լուծել այդ պետության հետ:
- Ռուսաստանն Ադրբեջանի հետ էլ լավ հարաբերություններ ունի:
- Պուտինը փորձեց կանգնեցնել պատերազմը, խնդիրներին մի քիչ լուծում տվեց, հանդիպում եղավ: Ռուսաստանի հարաբերությունները մեզ հետ ռազմաքաղաքական են:
- Ինչպե՞ս եք վերաբերում, որ զենք են վաճառում Ադրբեջանին:
- Ես խոսել եմ այդ մասին, շատ վատ:
- Դուք կարո՞ղ եք խիստ լինել այդ հարցում Ռուսաստանի նկատմամբ:
- Հետևեք իմ ելույթներին ու կիմանաք՝ խիստ եմ, թե խիստ չեմ:
- Ձեր ելույթում ասացիք, որ բանակի ոլորտում կոռուպցիա կա: Իսկ առհասարակ կոռուպցիայի դեմ ինչպե՞ս պայքարել:
- Կառավարությունը ստեղծել է հատուկ խորհուրդ, որը զբաղվում է այդ հարցով: Մի քիչ համբերություն ունենանք, կտեսնենք, թե ինչ են անում:
- Ինչո՞ւ հրաժարվեցիք քաղաքականություն մուտք գործելու մտքից:
- Իսկ ես ասացի, որ հրաժարվե՞լ եմ:
- Նախորդ անգամ, երբ Երևանում էիք, ասուլիսից հետո շտապեցիք Սերժ Սարգսյանի մոտ, հիմա՞ էլ եք գնում նրա մոտ:
- Որ ուշանում եմ, պետք ա անպայման նախագահի հետ հանդիպե՞մ... Ամեն անգամ հո տենց չի՞, բախտը չի բերում...
- Սերժ Սարգսյանը պետք է թույլ տա՞, որ քաղաքականություն մտնեք:
- Իսկ ձեր օրենքներով այդպե՞ս է՝ պետք է թույլ տա՞: Ես նման փորձ չունեմ: Ինձ չի կարող որևէ մեկն արգելել...
-«Համախմբում» կուսակցությանն ինչպե՞ս եք վերաբերում: Կհամագործակցե՞ք նրանց հետ:
- Դե մենք հիմա խորհրդարանական կառավարման պետություն ենք, ինչքան շատ լինեն կուսակցություններն, այդքան լավ: