Արցախը կհրապարակի աշխարհասփյուռ հայության փոխանցած գումարների ծախսերի հաշվետվությունը
Հուլիսի 8-ին Արցախի Ազգային ժողովին է ներկայացվել Արցախի Հանրապետության կառավարության օպերատիվ շտաբի գործունեության հաշվետվությունը. այս մասին ֆեյսբուքյան իր էջում գրառում է կատարել ԱՀ-ի կառավարության մամուլի խոսնակ Արտակ Բեգլարյանը:
«Հատկապես նրանք, ովքեր հատուկ հաշվեհամարի գումարների ծախսման մասով անվստահություն ունեն կառավարության հանդեպ, պետք է հաշվի առնեն, որ ԱԺ-ին (այդ թվում՝ ընդդիմադիր պատգամավորներին) են ներկայացվել բազմաթիվ մանրամասներ, որոնք կրում են գաղտնի տեղեկատվություն»,- գրել է Արտակ Բեգլարյանը նշելով, որ դա նշանակում է, որ պատգամավորները կարող են ամբողջությամբ վերահսկել ծախսերը և, որևէ խնդիր նկատելիս, բարձրաձայնել դրա մասին:
Նշենք, որ ըստ Արցախի ԱԺ-ի պաշտոնական կայքի՝ հաշվետվության համաձայն՝ 100- ից ավելի նոր մեքենա է տրամադրվել պաշտպանության նախարարությանը, փրկարար ծառայությանը, շտապօգնության կայաններին և պետական կառավարման համակարգերին՝ հիմնականում շրջանային:
Դրամական փոխանցումները կազմել են 4 մլրդ 562 մլն 175 հազար դրամ: Հուլիսի 1-ի դրությամբ՝ ստացված գումարի շուրջ 50 տոկոսը ծախսվել է, որից հատկացումներ են կատարվել ինժեներական աշխատանքների իրականացման և զորակոչված քաղաքացիների դրամական փոխհատուցման համար:
«Կառավարությունը պարբերաբար հրապարակում է հատուկ հաշվեհամարի մուտքերի հաշվետվությունը, իսկ հուլիսի 11-ին կհրապարակի ծախսերի եռամսյակային հաշվետվությունը՝ ընդհանուր տվյալներով՝ առանց բացահայտելու ռազմական գաղտնիք պարունակող մասերը:
Ավելին՝ մոտակա ժամանակահատվածում հատուկ հաշվեհամարի գումարներով կատարված աշխատանքները ներկայացնելու ենք նաև մի շարք հասարակական-քաղաքական գործիչների, ովքեր վստահություն են վայելում հասարակության շրջանում»,- գրել է Արտակ Բեգրալյանը: