Արթիկի քաղաքապետը դեռ կպարզի՝ արդյոք հեղեղի պատճառը սելավատարի վրա կառուցված շինությունն է
Արթիկի քաղաքապետ Արսեն Աբրահամյանն անտեղի է համարում այն մեղադրանքները, որ ներկա իշխանության անփութության և հատկապես նախկին իշխանության անմիջական մեղավորության հետևանքով են Արթիկում նման ծավալի հեղեղումներ եղել, բայց նշում է, թե դեռ կզբաղվեն խնդրով:
Հիշեցնենք, որ այսօր հրավիրված ասուլիսին «Աջակցենք սահմանամերձ բնակավայրերին» նախաձեռնության անդամները, ովքեր եղել էին Արթիկում՝ հայտարարեցին, որ նախկին քաղաքապետը սելավատարը փակել էր երկաթբետոններով և վրան գոյացած հողի վրա ելակներ աճեցրել: Արդյունքում, Արթիկի հանքերի թափոններnվ անձրևներից եկել և երկաթբետոնների դիմաց խցանվել էին, և ջուրը դուրս էր եկել ու լցվել քաղաք:
Բացի այդ, նախաձեռնության անդամները նշել էին, որ տարածքի բնակիչները մի քանի անգամ բողոքել են, որ սելավատարով ջուր չի գալիս, բայց ոչ մեկ նրանց չի լսել:
«Քաղաքային իշխանությունն այստեղ մեղք չունի: Սելավատարով ջուրը եկել, անցել է, բայց դրանց վրա շինություններ, իսկապես, առկա են, որոնց համար ունեն փաստաթուղթ, պետական օրինական գրանցում ունեն»,-ասաց քաղաքապետը:
Դիտարկմանը, թե այսինքն՝ նախկին քաղաքապետն ինքն իրեն թույլտվությո՞ւն է տվել, քաղաքապետն ասաց, որ չգիտի: «Ինձ ժամանակ չի եղել, ես ասում եմ ու կրկնում եմ, ես հեղեղատարի վրա որևէ շինություն թույլտվություն կառուցելու չեմ տվել»,-ասաց նա և հարցեց, թե ո՞վ է ասում, որ այդ շինությունները նախորդի օրոք են կառուցվել:
«Ո՞վ ասաց, թե նախորդն է կամ նախորդից նախորդը: Ես խնդիր չեմ դրել, որ հետևանքներն իմ նախորդի գործողություններն օրինական են, թե օրինական չեն, ես պահանջում եմ փաստաթուղթ, և մարդիկ ներկայացնում են այդ փաստաթուղթ: Կա Ջրային կոմիտե և մյուս խնդիրներով զբաղվող կառույցներ, բայց եթե ինչ-որ գործունեություն են ծավալել, ես ենթադրում եմ, որ նրանք համապատասխան փաստաթղթեր ներկայացրել են»,-ասաց Արսեն Աբրահամյանը:
Իսկ թե հաստատում է, որ նախորդ քաղաքապետի կողմից ելակներ աճեցնելու համար երկաթբետոնները դեր ունեցե՞լ են սելավատարի փակվելու մեջ,քաղաքապետը պատասխանեց. «Մենակ այդ պանելները չեն, բոլոր սելավատարներն էլ խոչընդոտներ ունեցել են, և ես այդ մասին ասել եմ, վարչապետի հանձնարարականը կա, և մենք ուսումնասիրելու ենք: Եթե ոչ պատշաճ փաստաթղթեր են տվել, կանոնների խախտումներ են եղել, կուսումնասիրվի և պարզաբանումներ կտրվեն: Բայց դրանք այդ հեղեղումների հետ այնքանով առնչություն ունեն, որ սելավատարների խցանման պատճառ են եղել, իսկ սելավի բուն պատճառն աննախադեպ անձրևներն են եղել և հսկայական քանակի թափոնները»։
Ըստ քաղաքապետի՝ այդ հանքանյութերը սարերից եկել են ու փակել սելավատարերը, իսկ հանքերը շահագործվել են 1930-ականներից մինչև 90-ականներ: « 60 տարի է, և մենք ոչինչ չէին կարող անել»,-ասաց նա:
Թե այս պահին ի՞նչ պետք է այդուհանդերձ անեն, Արսեն Աբրահամյանը նշեց, որ, իհարկե, պետք է սելավատարը մաքրվի:
«Դուք պատկերացնո՞ւմ եք 4 կմ երկայնքով երկու հեղեղատար պետք է ուսումնասիրվի ամբողջությամբ, հատ առ հատ փաստաթղթեր ենք պահանջելու, որ մարդիկ ներկայացնեն: Հիմա զբաղված են հեղեղատարի մաքրման աշխատանքներով, այդ ամենը մի քանի օրից վերջացնեն և արդեն կանցնեք մյուս խնդրին»,-եզրափակեց քաղաքապետը: