Պետծառայողները զրկվում են հանգստի, կրթության ու հիպոթեքային վարկերի դիմաց վճարելու հնարավորությունից. արհմիությունը քայլեր կձեռնարկի
Պետաշխատողների արհմիությունը բացասական է գնահատում սոցփաթեթների հանգստի բաղադրիչը կասեցնելու մասին կառավարության որոշումը, քանի որ այն վատթարացնում է պետծառայողների սոցիալական պաշտպանության վիճակը:
Այս մասին Tert.am-ի հետ զրույցում ասաց Հայաստանի պետական հիմնարկների արհմիությունների ճյուղային արհմիության նախագահ Անահիտ Ասատրյանը:
«Բացասական եմ վերաբերվում դրան, որովհետև մարդիկ կարողանում էին իրենց հանգիստը կազմակերպել: Ճիշտ է՝ քիչ օրերով, որովհետև գները թանկ են, գումարը քիչ, 72 հազար դրամ է ընդամենը, բայց հնարավորություն կար գոնե մի երկու-երեք օրով գնալ հանգստանալու: Իսկ հիմա այդ հանգստի հնարավորությունից զրկվում են, այն էլ 2017-2019 թվականների ընթացքում», - մեզ հետ զրույցում ասաց Հայաստանի պետական հիմնարկների արհմիությունների ճյուղային արհմիության նախագահ Անահիտ Ասատրյանը:
Երեկ ՀՀ աշխատանքի և սոցիալական հարցերի նախարար Արտեմ Ասատրյանը կառավարության նիստից հետո լրագրողներին ասաց, որ 2017-2019 թվականների միջնաժամկետ ծախսերի շրջանակում հանգստի բաղադրիչը կասեցվելու է: «Այս պահի դրությամբ՝ 2017-ի համար միջնաժամկետ ծախսերի ծրագրով այդ մասով ծախսեր նախատեսված չեն»,- ասաց նախարարը՝ հավելելով, որ չարաշահումներ են կատարվել ու այժմ դրանք քննվում են:
Նախարարը նաև ասաց, որ պետբյուջեում սոցփաթեթի հետ կապված միջոցների ծավալը կազմում է 10 մլրդ դրամ, իսկ դրանից օգտվողների թիվը հասնում է 100 հազարի:
«Չնայած չարաշահումներին, կան նաև բարեխիղճ պետական աշխատողներ, որոնք դրա կարիքը շատ ունեն: Այս որոշումը մեծ ազդեցություն ունի, որովհետև այս փաթեթից օգտվում են բոլոր պետական աշխատողները՝ ուսուցիչները, սոցիալական, մշակույթի ոլորտի աշխատողները, քաղծառայողները, պետական տարբեր ծառայողներ, որոնց թիվն ավելի քան 100 հազար է»,-ասաց պետական ծառայողների արհմիության ներկայացուցիչը:
Անահիտ Ասատրյանի խոսքերով՝ արհմիությունն անպայման քայլեր է ձեռնարկելու ու առաջին քայլով դիմելու են կառավարությանը. «Պետծառայողների սոցիալական պաշտպանվածության աստիճանն է պակասում: Իհարկե, մենք դրա դեմ մեր ձայնը պետք է բարձրացնենք, որովհետև մենք երկու տարի է՝ դիմում ենք կառավարություն, որ համայնքային և ՏԻՄ-երի աշխատակիցներին նույնպես տրվի սոցփաթեթ, որովհետև համարում ենք անարդար, որ պետական ծառայողներն ունեն, իսկ նրանք չունեն: Առաջին քայլն այն կլինի, որ մենք կդիմենք կառավարություն»:
Ըստ Անահիտ Ասատրյանի՝ հանգստի հնարավորությունը շատ կարևոր է աշխատանքի արդյունավետության բարձրացման տեսանկյունից: «Դա նաև փոքր մոտիվացիա է, որ մարդիկ պետական աշխատող լինեն: Մարդիկ այսօր փոքր հնարավորություն ունեն վճարելու իրենց հանգստի համար»:
Արհմիության նախագահը ահազանգում է, որ կասեցման որոշումն ավելի բացասական սոցիալական արձագանք կունենա, քանի որ սոցփաթեթի այդ մասը՝ 72 հազարը ծառայում է ոչ միայն հանգստի համար, այլև այդ գումարը կարող է ուղղվել նաև պետաշխատակիցների կրթության, երեխաների ուսման վարձի, հիպոթեկային վարկերի տոկոսների մարմանը:
«Եթե 72 հազարը չի տրվելու, նշանակում է, մենակ հանգստի մասով չի կասեցվելու գումարը, նշանակում է պետական ծառայողները կրթության համար էլ չեն կարող վճարել, հիպոթեքային վարկի տոկոսներն էլ չեն կարող վճարել: Դա նույն գումարից էր տրվում: Մարդը կարող էր չգնալ հանգստի և այդ գումարն ուղղել իր կամ երեխայի ուսման վարձի վճարմանը, կամ հիպոթեքային վարկի տոկոսների վճարմանը, իսկ հիմա այդ հնարավորությունից պետծառայողները զրկվում են: Որոշումը վատթարացնում է պետծառայողների սոցիալական պաշտպանության վիճակը: Սա ուղղակի անթույլատրելի է»,-ասաց արհմիության ներկայացուցիչը:
Արհմիության ներկայացուցիչը չի բացառում, որ սա պարզապես գումար խնայելու տարբերակ է՝ պետծառայողների հաշվին: «Եթե չարաշահումները բացահայտելու հետ էր կապված, դա կարելի էր ավելի արագ անել: Ինչ որ միջոցներ կարելի է գտնել, որ չարաշահումներ չլինեն»,-ասաց պետական հիմնարկների արհմիությունների ճյուղային արհմիության նախագահը: