Ղարաբաղյան հարցի վերաբերյալ հետաքրքրությունը մեծանում է, հնարավոր է՝ ՆԱՏՕ-ն ևս փոխի իր մոտեցումները դրա վերաբերյալ. Ստեփան Գրիգորյան
Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանի խոսքով՝ քանի որ նոր իշխանությունները որոշել են Հայաստանի արտաքին քաղաքականության մեջ կտրուկ փոփոխություններ չանել, ապա ՆԱՏՕ-ի հետ Հայաստանի համագործակցության ձևաչափերում էլ փոփոխություններ սպասել պետք չէ:
Tert.am-ի հետ զրույցում նա, սակայն, չբացառեց, որ հուլիսին սպասվող ՆԱՏՕ-ի բրյուսելյան գագաթնաժողովում Ղարաբաղյան հիմնախնդրի վերաբերյալ հայտարարություններում փոփոխությունների ենթարկված մոտեցումներ կարող են լինել:
«Նոր իշխանությունները եկել են երկրի ներսում փոփոխություններ անելու համար, առաջին հերթին դրանց վրա են կենտրոնացած: Այն, որ նրանք ցանկանում են պահպանել մեր համագործակցությունը ՆԱՏՕ-ի հետ տարբեր ֆորմատներում, արդեն դրական է,- ասաց նա՝ հավելելով, որ Նիկոլ Փաշինյանն իր պայքարի, նաև վարչապետ ընտրվելու ժամանակ չի էլ ասել, որ արտաքին քաղաքականությունում կտրուկ փոփոխություններ կանեն,-ինչ խոստում տվել են, նրանք կկատարեն: Խոստում էր, որ կշարունակեն ակտիվ աշխատել Ռուսաստանի հետ, խոստում էր, որ Եվրամիության հետ ստորագրած համաձայնագիրը կիրականացնեն, խոստում էր, որ վիզայի ազատականացման շուրջ կաշխատեն»:
Ստեփան Գրիգորյանի բնորոշմամբ՝ պետք էլ չէ, որ Հայաստանն այս պահին կտրուկ փոփոխություններ անի իր արտաքին քաղաքականության մեջ: «Հարցը միայն այն չէ, թե ինչ գաղափարախոսություն ունի այսօրվա իշխանությունը կամ այսօրվա վարչապետը, նաև այն է, որ «թավշյա հեղափոխությունը» դեռ ավարտված չէ: Պետք է նոր ընտրություններ անցկացնենք: Պետք է Ազգային ժողովն էլ փոխվի, նոր դրանից հետո, երբ նոր մեծամասնություն կլինի Ազգային ժողովում, այդ ժամանակ կկարողանանք իշխող կոալիցիայից ինչ-որ բան պահանջել: Հիմա մեզ մոտ անցումային շրջան է, և դա է պատճառը, որ կարծում եմ՝ հիմա կտրուկ փոփոխություններ անել պետք չէ»,- ասաց նա:
Հուլիսին նախատեսված ՆԱՏՕ-ի բրյուսելյան գագաթնաժողովին, քաղաքագետի կանխատեսմամբ, Հայաստանն ինչ-որ մակարդակով կներկայանա, հիմա, նրա համոզմամբ, ՀՀ արտաքին գերատեսչությունը հավուր պատշաճի կպատրաստվի դրան:
«Կասկած չունեմ, որ արտաքին գործերի նախարարությունը հիմա դիվանագիտական խողովակներով աշխատանք տանում է այդ ուղղությամբ»,- ասաց նա:
Ստեփան Գրիգորյանը չբացառեց, որ ՆԱՏՕ-ի այս անգամվա գագաթնաժողովին Ղարաբաղյան հիմնախնդրի մասին քննարկումներ լինեն: «Կարծում եմ՝ կարող են անգամ փոխված մոտեցումներ լինել Ղարաբաղյան հիմնախնդրի վերաբերյալ: Պետք է այդ հարցում ուշադիր լինենք: Քանի որ ԱՄՆ նախագահ Թրամփը հայտարարություններ արեց, կարևոր հայտարարություններ արեց նաև Ֆրանսիայի արտգործնախարարը: Դա նշանակում է, որ Ղարաբաղյան հարցի վերաբերյալ հետաքրքրությունը մեծանում է»,- ասաց նա՝ նշելով, որ այդ հետաքրքրվածության մեծացման դրսևորումներ կարող են լինել նաև ՆԱՏՕ-ում:
Ստեփան Գրիգորյանի խոսքով՝ ինքը, ճանաչելով նորանշանակ արտաքին գործերի նախարար Զոհրաբ Մնացականյանին, կասկած չունի, որ գիտակցում է, որ նման իրավիճակ կլինի և դրան պատրաստվում է:
Արդյոք ՆԱՏՕ-ն Հայաստանի նոր իշխանությունների հետ կվերանայի՞ իր հարաբերությունները. այս հարցի պատասխանը, Ստեփան Գրիգորյանի խոսքով, շատ պարզ է և հասարակ՝ ՆԱՏՕ-ն կհամագործակցի Հայաստանի հետ այնքան խորը, որքան վերջինս ցանկանա:
«Հիմա ինչ-որ մակարդակով Հայաստանն իր հարաբերությունները ՆԱՏՕ-ի հետ կպահպանի, բացառվում է, որ ՆԱՏՕ-ն միակողմանի ինչ-որ բան նախաձեռնի, դա իր սկզբունքներին կհակասի»,- ասաց նա:
Ռուսաստանը, քաղաքագետի համոզմամբ, կշարունակի չխառնվել Հայաստանի և ՆԱՏՕ-ի հարաբերություններին: «Հաշվի առնելով, որ Ռուսաստանը չմիջամտեց մեր գործերին, ուրեմն պետք է կարծենք, որ նրանք մեզ չեն համարում պրո-արևմտյան երկիր՝ պրիմիտիվ իմաստով: Ռուսաստանը Հայաստանում կատարվածը բավականին չեզոք և հավասարակշռված ընկալեց, նշանակում է՝ մտավախություններ չեն տեսնում: Նախկին իշխանությունների ժամանակ էլ չի ասել՝ մի՛ աշխատեք ՆԱՏՕ-ի հետ: Ուրեմն ինչ-որ աստիճանի համագործակցության մասին է խոսքը, Ռուսաստանը պրիմիտիվ չի միջամտի»,- ասաց նա: