Վալերի Օսիպյանն իր փոքր սխալներով հանդերձ, կարծում եմ, որ նախկին համակարգից ընդունված կանոն այլևս չի կարող իրականացնել. Դավիթ Սանասարյան
Քաղաքացիական ակտիվիստ Դավիթ Սանասարյանը ֆեյսբուքյան իր էջում ուղիղ եթերի ժամանակ անդրադարձավ ՀՀ վարչապետ Նիկոլ Փաշինյանի առաջարկով ՀՀ ոստիկանապետի և Ազգային անվտանգության ծառայության տնօրենի նշանակումներին:
Իսկ մինչ այդ նա հիշեցրեց, որ ինքը հայտարարել էր, որ կառավարությունում չի լինելու և շարունակում է նույն համոզման մնալ:
«Ես իմ խոսքի տերն եմ, չեմ լինելու կառավարությունում, նախարարություններում չեմ լինելու, բայց մինչև օրենքը կարդալը շատերի պես ուզում էի դառնալ ոստիկանության պետ, քանի որ այդ համակարգը փոխելու լուրջ ամբիցիաներ ունեի»,-ասաց նա և բացատրեց, թե ինչու չէր կարող համակարգից դուրս որևէ մեկը նշանակվել ոստիկանության պետ:
Նրա խոսքով՝ ըստ օրենքի ոստիկանության պետ կարող է նշանակվել վերջին 3 տարում ոստիկանությունում ծառայող այն անձը, որն ունի առնվազն գնդապետի կոչում:
Իսկ թե ինչ խնդիրներ է տեսնում ոստիկանությունում, որոնց պետք է լուծումներ տրվեն, թվարկեց. «Պետք է բացառվի գողական հասկացությունը, ովքեր կապեր ունեն գողականների հետ, չպետք է լինեն համակարգում, պետք է գերիշխեն իրավունքն ու օրենքները, և համակարգի մաս կազմող անձը չպետք է ունենա բիզնեսներ: Մենք չենք պայքարել, որ մեկը գա ու շարունակի ՀՀ նախկին իշխանությունների վարքն ու բարքը, ոստիկանությունը պետք է կոնկրետ փոխվի»,-ասաց նա:
Այնուհետև նա թվարկեց, թե ինչ փոփոխություններ է ակնկալում: Ըստ նրա՝ նախկին ոստիկանապետ Վովա Գասպարյանի անվտանգության պետ Արշակ Հակոբյանը և նրա ստեղծած համակարգը պետք է գոյություն չունենան: «Ես անձամբ՝ որպես քաղաքացի և այս գործում լումա դրած անձ, պետք է ոստիկանապետից խնդրեմ, որ այս ամենը ջարդի»,-ասաց նա:
Ինչ վերաբերում է ոստիկանապետ նշանակված Վալերի Օսիպյանի անձին, ապա Դավիթ Սանասարյանը նշեց, որ նրան 10 տարուց ավելի ճանաչում է, բարիկադների տարբեր կողմերում են եղել, շատ անգամ եղել է նաև համագործակցություն, որպեսզի չլինեն բախումներ։
«Բայց նախկինում արված մեծ ու փոքր սխալներով հանդերձ, կարծում եմ, որ Վալերի Օսիպյանը նախկին համակարգից ընդունված կանոն այլևս չի կարող իրականացնել: Վալերի Օսիպյանը նոր Հայաստանում է, որտեղ իշխանությունը ժողովուրդն է, և իշխանությունը նշանակել է վարչապետին և նրան վստահել հետագա նշանակումների համար»,-ասաց նա: