Դավիթ Տոնոյանը կնշանակվի պաշտպանության նախարար. Նիկոլ Փաշինյան
Այսօր Դավիթ Տոնոյանը կնշանակվի Պաշտպանության նախարար, իսկ մյուս նախարարների նշանակումները կլինեն առաջիկայում. այսօր Կառավարության նիստից հետո լրագրողների հետ ճեպազրույցում ասաց ՀՀ վարչապետ Նիկոլ Փաշինյանը:
Նա շեշտեց, որ ոչ թե կոալիցիոն, այլ համաձայնության կառավարություն են ձևավորելու:
«Կադրային լավագույն լուծումները պետք է գտնենք և «Ծառուկյան» դաշինքը, այո՛, նույնպես ներգրավված կլինի կառավարությունում»,-ասաց նա:
Հարցին՝ Դաշնակցությունը կլինի՞ կառավարությունում, ասաց, որ քննարկումները շարունակվում են:
Բացի այդ ՀՀ վարչապետ Նիկոլ Փաշինյանը տեղեկացրեց, որ ՀՀ փոխոստիկանապետ Լյովա Երանոսյանը կազատվի Ոստիկանության զորքերից: Իսկ թե կատարված բռնի գործողությունների համար ոստիկանական համակարգի այլ ներկայացուցիչներ պատիժներ կստանա՞ն, Նիկոլ Փաշինյանը պատասխանեց, որ նրանք, որոնք վարչապետի տիրույթում են և դրա համար կլինեն հիմքեր՝ կիրականացվեն:
«Մյուս մասերով ասել եմ՝ չեմ կարող միաժամանակ լինել վարչապետ, քննիչ, դատախազ, դատավոր»,-ասաց նա:
Անդրադառնալով հարցին՝ ծառայողական քննություն իրականացնելու հանձնարարական կտրվի՞, թե ոչ, Նիկոլ Փաշինյանը պատասխանեց, որ բոլոր գործերին պատասխան կտրվի: «Եթե կոնկրետ դեպքեր նկատի ունեք, եթե կան, հիմա դժվարանում եմ ասել՝ կոնկրետ դեպք, բայց ամեն ինչ կարվի»,-ասաց նա: