Հայաստանի միջազգային վարկի բարձրացման արդյունքում ուժային կենտրոնները շահագրգռված են ՀՀ-ի և Արցախի խաղաղ ապագայով. Վահրամ Աթանեսյան
Լեռնային Ղարաբաղի Ազգային ժողովի արտաքին հարաբերությունների մշտական հանձնաժողովի նախկին նախագահ Վահրամ Աթանեսյանի կանխատեսմամբ՝ անձերի փոփոխությունը դժվար թե ղարաբաղյան հիմնախնդրում փոփոխություններ բերի:
Նա Tert.am-ի հետ զրույցում ներկայացրեց իր գնահատականը, թե արդյոք կփոխվի Ադրբեջանի կամ Ալիևի պահվածքը՝ Նիկոլ Փաշինյանի վարչապետ դառնալու հետևանքով:
«Մենք կարծես առաջ էլ ենք ընկնում: Որքան ես եմ հասկանում՝ Նիկոլ Փաշինյանը լինելու է ժամանակավոր կառավարության վարչապետ, և այդ ընթացքում հազիվ թե բանակացային գործընթաց լինի, զարգացումներ լինեն, որ կարիք լինի Հայաստանը առաջին դեմքով ներկայանա: Այնպես որ, Նիկոլ Փաշինյանը հնարավոր է՝ չհասցնի էլ Իլհամ Ալիևի հետ հանդիպել, որովհետև ոչ ոք չգիտի, թե արտահերթ ընտրություններից հետո ինչ է լինելու»,- ասաց նա:
Վահրամ Աթանեսյանի նկատառմամբ՝ Ադրբեջանում կարծես թե սպասելքիներ կան, որ նոր կառավարությունը Ղարաբաղյան հիմնախնդրի հարցում կարող է ունենալ այլ դիրքորոշում, թե որքանով են այս սպասելիքները հիմնավոր, ըստ նրա, ցույց կտա ժամանակը:
Ղարաբաղյան հիմնախնդրի կարգավորմամբ զբաղվող ԵԱՀԿ Մինսկի խմբի համար Հայաստանում կատարված ներքաղաքական գործընթացներն անսպասելի էին: Վահրամ Աթանեսյանը հիշեցրեց, որ մինչ հեղափոխությունը միջնորդները պատրաստվում էին Հայաստանի և Ադրբեջանի ղեկավարների հանդիպումը կազմակերպելուն:
«Ռուսական կողմը շրջանառության էր դրել տեղեկատվություն, ըստ որի, բանակցային սեղանին կա նոր տեղեկատվություն: Նույնիսկ Ադրբեջանի արտգործնախարար Մամեդյարովը դրանք անվանել էր «կրեատիվ»: Հիմա հայկական հեղափոխությունը փոխել է իրավիճակը. դեռ կողմերը չեն կարող բան քննարկել, քանի որ Հայաստանում պետության ղեկավար չկա: Նաև Նիկոլ Փաշինյանը պետք է ծանոթանա բանակցային գործընթացի նրբություններին: Այնպես որ, մինչև տարեվերջ ես չեմ կանխատեսում որևէ փոփոխություն բանակցային գործընթացում»,- ասաց նա:
Նիկոլ Փաշինյանի՝ Ղարաբաղյան հիմնախնդրին վերաբերող դիտարկումները հրապարակից, ըստ Վահրամ Աթանեսյանի, որոշակի առումով պոպուլիստական են: «Այդ հայտարարություններն արվում են հրապարակի համար, մանավանդ կա ենթատեքստ, որ Հանրապետական խմբակցությունը լուրջ պրեսինգի նրան ենթարկեց շուրջ 20 տարի առաջ հեղինակած մի հրապարակման համար: Փաշինյանի այսօրվա արած հայտարարությունները ամբոխահաճ խոսքեր են, բայց պետության ղեկավարի լիազորությունները ստանձնելուց հետո նա կփոխի իր դիրքորոշումը և ավելի պրագմատիկ գործելաոճ կորդեգրի»:
Վահրամ Աթանեսյանի խոսքով՝ այն, ինչ դրված է այսօր բանակցային սեղանին, առավելագույնն է, ինչ միջնորդները կարող են առաջարկել որպես փոխզիջում կողմերի համար: «Այլ չափազանցված սպասումներ, կարծում եմ, հայ հասարակությունը չպետք է ունենա ո՛չ Հայաստանում, ո՛չ Արցախում: Եթե խոսքը վերաբերում է խաղաղ բանակցային ճանապարհով հիմնախնդիրը լուծելուն, ապա այսօրվա տարբերակը «ոսկե միջինն է», որը ձեռք է բերվել տարիների տքնաջան աշխատանքի շնորհիվ»,- ասաց նա:
Նրա կարծիքով՝ Նիկոլ Փաշինյանը պարզապես չի կարող չեղարկել եղած ռեսուրսը: «Այլընտրանքը ո՞րը կարող է լինել.կարող է լինել Հայաստանի կողմից Լեռնային Ղարաբաղի ճանաչումը, Հայաստանի մարզ ճանաչելը,- նշեց նա՝ նկատելով, որ դա կնշանակի բանակցությունների ճանապարհը փակել,-Պետք է մտածել հետևանքների մասին: Ռուսաստանը փաստացի չի մարսում Ղրիմի և Հարավային Օսիայի անեքսիան: Միջազգային հանրությունը նրան պատժամիջոցների է ենթարկում»:
Դիտարկմանը, թե Նիկոլ Փաշինյանը հայտարարել է, որ ի վերջո Լեռնային Ղարաբաղը Հայաստանի անբաժանալի մասն է դառնալու, Վահրամ Աթանեսյանը պատասխանեց, որ դրա համար ի վերջո պայմաններ են պետք: «Քաղաքական, ռազմանական, տնտեսական, նույնիսկ դեմոգրաֆիական ռեսուրսներով պետք է հիմնավորված լինի նրա այս ցանկության իրականացումը: Գուցե 10-15 տարի հետո՝ Հայաստանի տնտեսության թռիչքային զարգացումից հետո նման պայմաններ լինեն, բայց ջանքեր են պետք: Բայց կան հիմական իրողություններ, որոնց հետ պետք է հաշվի նստել»,- ասաց նա:
Հիմա, ըստ Վահրամ Աթանեսյանի, Ադրեջանը չի փորձի պատերազմ սկսել: Նկատեց, որ դա Ադրբեջանի որոշումը չէ: «Փաստ է, որ 2016 թվականի ապրիլը հրահրված է եղել: Ու՞մ կողմից, այժմ չեմ ցանկանում խոսել: Այսօր այդ ուժը փաստացի չկա, և ընդհակառակը, Հայաստանում հեղափոխությունը բարձրացրել է իր միջազգային վարկը և ուժային կենտրոններն այսօր շահագրգռված են Հայաստանի և Արցախի խաղաղ ապագայով»,- ասաց նա: