Երիտասարդ քաղաքական լիդերներին ողջ փորձը փոխանցելու մասին Սերժ Սարգսյանի խոսքը վերաբերում էր նաև Նիկոլ Փաշինյանին, Էդմոն Մարուքյանին. Գ. Կոստանյան (տեսանյութ)
Նախագահ Սերժ Սարգսյանի խոսքը, թե բոլորս անելիք ունենք քաղաքական նոր առաջնորդների թրծման հարցում՝ անկախ նրանց կուսակցական պատկանելությունից, անկախ քաղաքական ներկա դիրքավորումից, վերաբերում է բոլորին:
Այսօր ԱԺ-ում լրագրողների հետ զրույցում նման տեսակետ հայտնեց ԱԺ պետական-իրավական հարցերի և մարդու իրավունքների մշտական հանձնաժողովի նախագահ Գևորգ Կոստանյանը: Նրա գնահատմամբ՝ սա ամենակարևոր հարցերից է, քանի որ երկրի նախագահը բոլորի նախագահն է, և նա բոլոր երիտասարդների ներուժն օգտագործելու է երկրի բարօրության համար:
«Այո, ես կարծում եմ, որ դա վերաբերում է նաև մեր հարգարժան գործընկերներ Նիկոլ Փաշինյանին, Էդմոն Մարուքյանին, Արտակ Զեյնալյանին և բոլորին, եթե նույնիսկ քաղաքական ընդդիմություն են: Երկրի բարօրության համար պայքարող, երկրին նվիրված տղաների և աղջիկների ներուժն օգտագործվելու է ի շահ երկրի զարգացման: Սա վերաբերում է բոլորին՝ անկախ քաղաքական կամ այլ կողմնորոշումից»,- ասաց Գևորգ Կոստանյանը:
Ինչ վերաբերում է հարցին, ինչու է Սերժ Սարգսյանը ստանձնել առաջնորդներ ստեղծելու գործը, Կոստանյան ասաց, թե երկրի առաջնորդը, բացի երկիրը ղեկավարելուց, նաև այլ՝ չափազանց կարևոր գործառույթ ունի՝ սերնդի դաստիարակությունը և երկրի զարգացման շարունակականությունն ապահովելը:
«Բա էլ ո՞վ պետք է նման կոչ աներ, ո՞վ պետք է առաջարկեր, որ հարգելի՛ ժողովուրդ, ես իմ առաջ խնդիր չեմ դնում, որ միայն ՀՀԿ-ի երիտասարդները դառնան լիդեր, կամ այդ կուսակցության լիդերներն օգտագործվեն երկրի կառավարման մեջ: Այս խոսքով նախագահը փաստեց, որ բոլորի նախագահն է, բոլորի առաջնորդն է և յուրաքանչյուրի ներուժն օգտագործելու է»,-ընդգծեց նա:
Գևորգ Կոստանյանը համակարծիք չէ այն տեսակետի հետ, թե նախագահ Սերժ Սարգսյանը նման հայտարարությամբ հանդես եկավ, քանի որ կարծում է, որ երկրում ընդդիմություն չկա:
«Ցանկացած իշխանության և պետության համար ընդդիմության առկայությունն ուղղակի անհրաժեշտություն է: Սերժ Սարգսյանը խոսում էր այն մասին, որ կայուն է իրավիճակը, չկան մեծ տատանումներ՝ քաղաքական և այլ դաշտերում, ինչը երաշխիք է երկրի զարգացման համար: Որևէ երկիր չի կարող զարգանալ, եթե չլինի կայունության երաշխիք»,- եզրափակեց Գևորգ Կոստանյանը: