Քննադատության սլաքը դեպի նախագահն ուղղելու խնդիր այս պահին չկա, քանի որ քննադատում ենք տնտեսական քաղաքականությունը. Ս. Բագրատյան (տեսանյութ)

Ազգային Ժողովի «Ծառուկյան» խմբակցության պատգամավոր Սերգեյ Բագրատյանը համակարծիք չէ այն տեսակետի հետ, որ «Ծառուկյան» դաշինքը ընդդիմություն է այնքան ժամանակ, քանի դեռ չի բախվում Հանրապետության նախագահ Սերժ Սարգսյանի շահերին:

Նրա խոսքով՝ այս պահին իրենք թիրախավորում են Կառավարության գործունեությունը, որովհետև այն նպատակաուղղված չէ ժողովրդի բարեկեցության բարձրացմանը: Բագրատյանի խոսքով՝ իրենց դաշինքում վարչապետի ընտրության հետ կապված որևէ քննարկում չի եղել, և ինքը չի կարող ասել՝ կսատարեն ՀՀԿ-ի թեկնածուին, թե ոչ:

-Պարո՛ն Բագրատյան, այսօր «Ծառուկյան» դաշինքի նկատմամբ հիմնական քննադատությունն այն է, որ Դուք լայնորեն քննադատում եք Կառավարության գործունեությանը, բայց, երբ հերթը հասնում է ՀՀ նախագահ Սերժ Սարգսյանին, արդեն իսկ որևէ գործողություն ձեր դաշինքը չի անում՝ հիշելով դառը փորձը: Ի՞նչ կասեք այս առիթով:

- Կարծում եմ՝ ձևակերպումը սուբյեկտիվ է, որովհետև դառը փորձի խնդիր չկա: «Ծառուկյան» դաշինքը քննադատում է Կառավարության գործունեությունը, որովհետև նպատակաուղղված չէ ժողովրդի բարեկեցության բարձրացմանը, այս  քննադատությունը շարունակվելու է այնքան, քանի դեռ  ժողովրդի բարեկեցությունը չի բարձրացել, իսկ հանրային կյանքում էլ պետության նկատմամբ վերաբերմունքը չի փոխվել: Քանի դեռ մարդկանց մոտ Կառավարության նկատմամբ հավատն ու հույսը բացակայում է, մենք այս պայքարը շարունակելու ենք, ավելին՝ սա չենք պայմանավորելու որևէ անձով: Նախագահին քննադատության սլաքն ուղղելու խնդիր չկա այն պարզ իմաստով, որ մենք քննադատում ենք տնտեսական քաղաքականությունը, իսկ նախագահը նշում է, որ տնտեսության պատասխանատուն Կառավարությունն ու վարչապետն են: Քննադատել որևէ այլ կառույցի տվյալ խնդրի համար, պատասխանատուին քննադատելու փոխարեն, իրավացի չենք լինի::

- Գործող Սահմանադրությամբ՝ ՀՀ նախագահն է նշանակել վարչապետին, ինչպես նաև նախագահ Սարգսյանն իշխող ՀՀԿ-ի նախագահն է, այսինքն՝ նրա ձևավորած քաղաքականությամբ է իր թիմն առաջ շարժվում, այդ թվում՝ նաև Կառավարությունը: Չէ՞ որ քաղաքական պատասխանատվությունը ոչ միայն Կառավարությանն է, այլև ՀՀԿ-ինն ու նախագահինը:

- Ձեր տրամաբանությունը ճիշտ է, բայց թիրախավորված չէ: Մենք պետք է թիրախավորենք Կառավարությանը, իսկ պատասխանատուները թող որոշում ընդունեն: Եթե մեր քննադատությունը տեղին է, վստահ եմ, որ այդ դեպքում հանրապետության նախագահը պետք է փոխի Կառավարության կազմը կամ առնվազն վարչապետին: Հիմա նկատում ենք, որ այս պահին մեր քննադատությունները դեռևս չեն ընդունվել բարձրագույն իշխանության կողմից: Օրինակ, եթե Ձեր խմբագիրը նյութ է հանձնարարում, բայց Դուք վատ եք կատարում, ես իրավունք չունեմ Ձեր խմբագրին մեղադրելու, քանի որ առաջին հերթին Ձեզ եմ մեղադրելու: Նույն հարաբերությունն է հանրապետության նախագահի ու վարչապետի պարագայում: Հիմա Կառավարությունն իր գործառույթը ճիշտ չի իրականացնում, ու մենք քննադատում ենք,  իսկ ապրիլից հետո ուղիղ պատասխանատուն կլինի իշխող կուսակցությունն ու իր նախագահը,  բայց այդ ժամանակ քննադատությունը նորից Կառավարության նկատմամբ է լինելու, ոչ թե անձերի: Ձեր հարցում անձնավորումը շատ է, իսկ իմ մոտեցումն ավելի շատ ինստիտուցիոնալ է:

- Այդ դեպքում ինչպե՞ս է ստացվում, որ, երբ ՀՀԿ-ին այս կամ այն նախագիծն ընդունելու, կամ իրենց՝ նախագահի թեկնածու Արմեն Սարգսյանին ընտրելու համար ձայներ են պակասում, «Ծառուկյան» դաշինքը վերջին պահին ձայներով աջակցում է:

- Կոնկրետ հիմա միայն կարող եք ասել Արմեն Սարգսյանի ընտրության մասին, բայց Դուք նաև գիտեք, որ այնպես չէր, որ եթե «Ծառուկյան» դաշինքը չընտրեր, ապա Արմեն Սարգսյանը չէր ընտրվելու, քանի որ 2-րդ փուլով կանցներ:

-Բայց գոնե ՀՀԿ-ի համար խնդիր կլիներ, միգուցե նաև մրցակցություն լիներ, բայց քանի որ նրան առաջադրել է նախագահ Սերժ Սարգսյանը, «Ծառուկյան» դաշինքը ոչինչ չարեց:

- Այսինքն՝ ինքնանպատակ խնդիրնե՞ր առաջացնենք: Նման կերպ մենք հնարավորություն տվեցինք ՀՀ 4-րդ նախագահ ընտրված Արմեն Սարգսյանին ավելի լայն կաշկանդելու, նրան սահմանափակեինք՝ թողնելով, որ համարվի մեկ ուժի կողմից  առաջադրված և ընտրված  թեկնածու: Նման պարագայում նա ենթագիտակցորեն կախվածություն կունենար իրեն առաջադրած և ընտրած ուժից, իսկ իրեն առաջադրած ուժն իրավունք կունենար իրեն խնդրել ինչ-որ հարցերում, քանի որ իրենց առաջադրած և ընտրած թեկնածուն է: Մենք Արմեն Սարգսյանի համար ապահովել ենք, որ ավելի լայն օգտագործի հնարավորությունները հանրապետության  նախագահի, որոնք նրան տրամադրված են Սահմանադրությամբ: Մենք վատ բան չենք արել, կարծում եմ, որ հասարակությունը սա կգնահատի:

- Ձեր քաղաքական ուժի ուշադրության կենտրոնում է Կառավարության գործունեությունը, շուտով Կառավարությունը հրաժարական կտա, իսկ վարչապետի թեկնածու առաջադրելու իրավունքը ՀՀԿ-ին է: ՀՀԿ-ում այս պահին 2 անուն է շրջանառվում՝ նախագահ Սերժ Սարգսյան, վարչապետ Կարեն Կարապետյան, բայց ՀՀԿ-ականները պնդում են, թե իրենք կհամոզեն ներկայիս նախագահին դառնալ պետության գլուխ: Դուք կո՞ղմ եք Սերժ Սարգսյանի թեկնածությանը:

- Ճիշտ ձևակերպեցինք, որ դա ՀՀԿ-ի գործն է: ՀՀԿ-ն կորոշի՝ իր կուսակցության առաջնորդի՞ն առաջադրել վարչապետի թեկնածու, թե՞ այլ թեկնածու կընտրի, սա կոնկրետ ՀՀԿ-ը կորոշի: Կարծում եմ՝ մենք չպետք է նայենք թեկնածուի անձին, մենք պետք է հասկանանք, որ ՀՀԿ-ն իր թեկնածուին կարողանալու է իր քվեարկությամբ անցկացնել, և տվյալ անձը դառնալու է  հանրապետության վարչապետը՝ քաղաքական պատասխանատվություն կրելով տնտեսության, ներքին, արտաքին քաղաքականութան  համար: Այլևս որևէ  կառույց չկա, որը կարող է պատասխանատվությունից խուսափել:

- ՀՀԿ-ում իրենց կուսակցության նախագահից, հանրապետության գործող նախագահից ստեղծել են անփոխարինելի կերպար, ավելին՝ ասում են, որ եթե ոչ Սերժ Սարգսյանը, ապա ո՞վ: Բազմամյա փորձ ունեցող քաղաքական գործիչ եք, Դուք որպես վարչապետի թեկնածու այլ կադրեր տեսնո՞ւմ եք, թե՞ ձեզ համար էլ է Սերժ Սարգսյանն անփոխարինելի:

- Դուք նշեցիք, որ ՀՀԿ-ի անդամները նշում են, որ իրենց համար Սերժ Սարգսյանն անփոխարինելի է, եթե իրենց համար այդպես է, ես ի՞նչ կարող եմ ասել: Անձամբ գտնում եմ, որ անփոխարինելի մարդ չկա:

-Ընդամենը 1 ամսից Կառավարությունը հրաժարական կտա, ձեր կուսակցությունում դեռևս քննարկումներ չկա՞ն, հնարավո՞ր է՝ առաջադրեք ձեր թեկնածուին:

-Մեր կուսակցությունում քննարկում չկա: ՀՀԿ-ն էլ օրերս հայտարարեց, որ իրենք դեռևս այս թեմայով քննարկում չեն արել, այսինքն՝ իրենք իրենց թեկնածուին դեռ չեն առաջադրել, բայց մենք մտածում, քննարկում ենք իրենց հնարավոր թեկնածուի անձը: Երբ մենք դեռևս 1 ամիս ժամանակ ունենք, մենք կքննարկենք ցանկացած թեկնածություն՝ կլինի դա ՀՀԿ-ինը, թե մերը, իսկ յուրաքանչյուր պատգամավոր կասի իր տեսակետը, և կգանք վերջնական տեսակետի:

-Պարզապես հիմա տեսակետ կա, որ «Ծառուկյան» դաշինքը վարչապետի թեկնածու չի առաջադրում, որ անհրաժեշտության դեպքում կարողանա աջակցել ՀՀԿ-ին:

- Բազմաթիվ կարծիքներ կարող են լինել, դա մարդկանց իրավունքն է:  Ես ասում եմ իրականությունը՝ որևէ քննարկում չի եղել, որևէ քաղաքական ուժ չի հայտարարել իր  թեկնածուն առաջադրելու մասին:

Մանրամասները՝ տեսանյութում: