Мирзияев: Үзбәкстан һәм Татарстан мөнәсәбәтләрендә — хезмәттәшлекнең югары динамикасы
Соңгы елларда Үзбәкстанның Татарстан белән мөнәсәбәтләре, Россия Федерациясенең башка субъектлары кебек үк, хезмәттәшлекнең югары динамикасы белән характерлана. Үзбәкстан Президенты Шәүкәт Мирзияев үзара эшчәнлекне шулай бәяләде.
«Машина төзелеше, электротехника, химия, ягулык-энергетика, тау-металлургия, аграр, тукыма әйберләр һәм башка өлкәләрдә сәнәгать кооперациясе киңәя. Россия Үзбәкстанның төп сәүдә партнерларының берсе булып кала», – дип билгеләп үтте ул Россия һәм Үзбәкстан арасында III Төбәкара хезмәттәшлек форумында катнашучыларны сәламләү сүзендә.
Мирзияев фикеренчә, инвестицион хезмәттәшлекне тирәнәйтү буенча илләрнең мөмкинлекләре зур. Моның өчен ул төзелә торган технопаркларны һәм финанс ярдәменең яңа кораллары, мәсәлән, Үзбәкстанның күптән түгел оештырылган Сәнәгатьне үстерү фондын активрак кулланырга чакырды.
Үзбәкстан Президенты хезмәттәшлекнең перспективалы юнәлеше дип яшьләр эшмәкәрлеген атады. Ул ике яклы аралашуны креатив яшьләрнең инновацион бизнес-проектлар белән тутырачагына ышана.
Моннан тыш, туризм өлкәсендә элемтәләрне ныгытуда зур потенциал бар. Әйтик, бу ел башыннан Үзбәкстанга инде Россиядән 350 меңгә якын турист килгән.