Әлки районында икенче тапкыр гаилә коручылар саны арткан
(Әлки, 2 гыйнвар, «Татар-информ», «Әлки хәбәрләре» , Лия Мәрдегалләмова). Узган елда никахларын теркәүчеләрнең иң олысына 70 яшь, аның кәләшенә 62 яшь тулган. Икесенең дә инде моңарчы гаиләләре булган. Бу турыда район ЗАГС бүлеге белгече Розалия Сафина әйтте. «Олы яшьтәге кешеләрнең ялгызлыктан котылып гаилә корулары аеруча сөендерә. Статистика раславынча, тулы гаилә белән яшәүчеләрнең гомере ялгызакларныкына караганда шактый озын», — дип раслыйлар ЗАГС хезмәткәрләре. Иң яшь кәләшләргә 18 тулган, ел дәвамында шундый өч кыз кияүгә чыккан. Быел районда теркәлгән 77 никахның 22се ир яки хатын өчен беренче түгел. Бу очракларда 9 ир-ат, 13 хатын-кыз икенче тапкыр гаилә корырга булганнар. Кызганычка, аерылышучылар саны да борчый. 2021 елда 48 гаилә таркалган. Бу өйләнешүчеләрнең 62 процентын тәшкил итә.