Новости за 29.04.2024

Татарстан Икътисад министрлыгының дәүләт идарәсен камилләштерү бүлеге башлыгы Гөлназ Исмәгыйлева вакытлыча ведомство башлыгы урынбасары итеп билгеләнде. ТР Министрлар Кабинеты боерыгын республика Премьер-министры Алексей Песошин имзалады.

Татарстан Республикасы Рәисе Рөстәм Миңнеханов Милләтара һәм конфессияара мөнәсәбәтләр советы составын үзгәртте. Указ хокукый мәгълүмат порталында чыкты.

Бүген Татарстанда алмашучан болытлы һава торышы көтелә. Урыны белән бераз яңгыр явачак. Көндез уртача яңгыр фаразлана. Бу хакта республиканың Гидрометеорология үзәге матбугат хезмәте хәбәр итә.

Татарстан прокуратурасы өч бала һәлак булган урыннан видео урнаштырды.

Сабада «Абилимпикс» сәламәтлек мөмкинлекләре чикле кешеләр фестивале булып узды. Әлеге чарада Югары Утар инвалид балалар интернат йорты, Кызыл Мишә, Курсабаш мөмкинлекләре чикле балалар мәктәпләре укучылары, Лесхоз картлар һәм инвалидлар йорты, «Балкыш» социаль тернәкләндерү бүлегендәге балалар һәм олылар катнашты. Бу хакта «Саба таңнары» газетасы яза.

Аксубай районының Трудолюбово авыл мәдәният йорты иң яхшы муниципаль мәдәният учреждениеләре республика бәйгесендә «Татарстан Республикасы авыл җирлекләре территориясендә булган мәдәни-ял тибындагы иң яхшы учреждение» номинациясендә җиңүче дип танылды. Бу хакта «Аксубай» газетасы яза.

Актанышта «KARGAFEST – ОЯFEST» – «Карга боткасы» бәйрәме оештырылды. Бу хакта «Актаныш-инофрм» яза.

«Россельхозцентр»ның республика филиалы белгечләре үткәргән көзге культураларны тикшерү нәтиҗәләре буенча, Алабуга районында барлык чәчүлекләрнең яхшы кышлавы ачыкланды. Бу хакта атна саен уздырыла торган киңәшмәдә Алабуга районының авыл хуҗалыгы һәм азык-төлек идарәсе башлыгы Александр Косов хәбәр итте. Гомумән алганда, быел районда чәчү мәйданы 5 мең гектарга артачак, дип яза «Алабуга нуры» газетасы