د ملګرو ملتونو استازې: برما له احتمالي کورنۍ جګړې سره مخ دی
![د ملګرو ملتونو استازې: برما له احتمالي کورنۍ جګړې سره مخ دی](https://gdb.rferl.org/b257b010-2cd7-4a50-ab15-3ef93e547ac6_w800_h450.jpg)
د برما لپاره د ملګرو ملتونو استازې د دې سازمان د امنیت شورا ته وویل چې دا هېواد له احتمالي کورنۍ جګړې سره مخامخ دی.
کرستین شرانیر بورګینیر تېره شپه د امنیت شورا د تړلو دروازو تر شاه غونډې ته وویل، په داسې حال کې چې د برما پوځ د کودتا ضد مظاهره چیانو ځپنې ته دوام ورکوي، په دې هېواد کې د کورنۍ جګړې او د وینې توئیدو احتمال زیات دی.
بورګینیر له نړیوالو قدرتونو وغوښتل چې د یوې غمیزې د مخنیوي لپاره دې اقدام وکړي خو نوموړې په دې اړه د مشخصو اقداماتو یادونه ونه کړه.
د فبرورۍ له لومړۍ نېټې راهیسې چې په برما کې پوځ ملکي حکومت نسکور کړی او قدرت یې په لاس کې اخېستی، تر اوسه د کودتا ضد مظاهره چیانو په ځپنه کې لږ تر لږه پنځه سوه کسان وژل شوي دي.