Berdimuhamedow koronawirus bilen göreşmäge görkezme berdi
25-nji fewraldaky maslahata Keselleriň ýaýramagyna garşy göreşýän adatdan daşary toparyň başlygy Pürli Agamyradow, şeýle-de saglygy goraýyş we derman senagaty ministri Nurmuhammet Amannepesow gatnaşdy.
Resmi maglumata görä, ýurtda howpsuzlygy üpjün etmek üçin degişli gözegçilik hem-de daşary ýurtlardan gelýän raýatlary lukmançylyk gözegçiligine almak çäresi ýola goýulypdyr. Gözegçilikdäki adamlaryň sany takyklaşdyrylmaýar.
Mundan başga-da, epidemiologik ýagdaý durnuklaşýança, bu keseliň ýaýran döwletlerine, gulluk zerurlygyndan başga halatlarda, türkmenistanlylaryň gitmekleri çäklendirilipdir. Emma, anyk haýsy ýurtlara bu çäklendirmäniň girizilendigi aýdyňlaşdyrylmaýar.
Şeýle-de, daşary ýurtlardan getirilýän azyk önümleriniň, halkyň sarp edýän harytlarynyň getirilmegine gözegçilik işleri güýçlendirilipdir.
Türkmen resmileri ýurtda koronawirus bilen ýoluganlaryň hasaba alynmandygyny aýtdylar.
Ýatlatsak, resmi türkmen metbugaty COVID-19 wirusy barada, onuň ýaýrap başlamagyndan iki aý soňra habar beripdi.
Bu aralykda, Türkmenistan Eýran we Owganystan bilen, bu döwletlerde koronawirusa ýoluganlaryň hasaba alynmagynyň yzy bilen, öz serhet araçäklerini ýapdy.