Удмуртиянең Можга шәһәрендәге бердәнбер балалар татар ансамбле юбилеен үткәргән
(Казан, 11 март, «Татар-информ»). Удмуртиянең Можга шәһәрендәге «Кояш нурлары» бердәнбер балалар татар ансамбле ун еллык юбилее уңаеннан бик матур концерт оештырды. Тантанага Ижевск шәһәренең «Асылъяр» балалар татар җыры һәм биюе төркеме кунакка чакырылган иде. Яшь сәхнә осталары кояшкайларны тәбрикләп, үзләренең иҗатларын һәм тәмле торт бүләк иттеләр. «Кояш нурлары» ансамбле җитәкчесенең хезмәте югары бәяләнде. Зилә Сафинага Удмуртия Республикасының Милли сәясәт министрлыгының Мактау грамотасы тапшырылды. Бу турыда « Яңарыш » газетасы хәбәр итә. Ансамбльнең тарихы 2011 елда — шәһәребезгә үз эшенең остасы, мәдәният хезмәткәре, Казан дәүләт филармониясендә эшләү тәҗрибәсе булган Зилә Сафина килү белән башланып китә. «Яныма 7 яшьлек Розалия Панфилова килде дә: «Апа, минем татарча җырларга өйрәнәсем килә», — диде. Менә бу сүзләр ансамбль оештыруга этәргеч булды да инде», — диде ул. Ун елда ансамбль 3 буын бала тәрбияли. Бүгенге көндә төркемгә 17 бала йөри. Балалар атнага 2 тапкыр вокал дәресләре ала. Ансамбль Можганың милли-мәдәни үзәгендә эшли. Биредә малайлар һәм кызлар татар җырларын өйрәнә. Зилә Сафина заманча жырлардан тыш, халык җырларына да зур игътибар бирә. Тамашачы «Кояш нурлары» ансамбленең татар телендә өздереп җырлавын ярата. Ансамбль — «Йолдызлар яңгыры», «Туган телем — иркә гөлем», «Чулпан» төбәкара конкурслары лауреаты.