Питрәч районы хәрбие бала тудыру йортыннан улын һәм хатынын каршы алды
Махсус хәрби операциядә катнашучы лейтенант Айнур, бала тудыру йортыннан яңа туган улын һәм хатынын каршы алу өчен озак көткән ялга кайткан. Бу хакта «Питрәч-информ» сайтында Люция Сираҗиева хәбәр итә.
Айнур югары икътисади белемле, хәрби хезмәткә киткәнче хуҗалык эшчәнлеге идарәсе җитәкчесе булып эшләгән. Аны өлешчә мобилизация кысаларында чакырганнар, хәрби хәрәкәтләрдә 2023 елның февраленнән катнаша. Хәрби бурыч авыр һәм куркыныч, әмма тиз арада гаилә белән очрашу турындагы уй алгы сызыкта көч бирә. Хезмәтен сержант булып башлаган. Ярты елдан соң лейтенант исемен ала һәм дошман турында мөһим мәгълүматлар алу һәм тапшыру өчен җаваплы разведка бүлеге офицеры була.
Айнур 2025 елның апрелен аеруча дулкынланып көтә. Бу гаиләдә икенче бала туасы ай. Хатыны Альбина белән алар 2013 елдан бирле бергә. Хәрби хезмәткәр бу мөһим моментта гаиләсе янында булу өчен алдан ук ял турында килешкән. Хатыны бәбиләгәндә бергә булырга планлаштырылган була, ләкин сабый көткәннән берничә көнгә иртәрәк дөньяга килә. Шуңа күрә әтисе бала туу вакытына өлгермәгән, аларны алып чыгарга кайтып өлгергән. Ул хатынын зур чәчәк бәйләме белән каршы алды. Парның олы балалары, биш яшьлек Динә дә әнисен һәм энесен каршы алырга килгән.
Гаилә Көектә яши, алар анда 2018 елда күчеп килгән. Аларның туганнары да шул ук авылда якында гына яши, шуңа күрә Альбина йөкле вакытта якыннары кайгыртуында булган.
Бәхетле әти хәзер бер генә нәрсә турында хыяллана – иң зур хыялы балаларының ничек үсүен күрер өчен тизрәк өйгә кайту. Динәгә, махсус хәрби операциядә катнашучының кызы буларак, балалар бакчасында ташламалар каралган һәм ул түгәрәкләргә бушлай йөри. Аның әтисе хәрби хезмәткәрләрнең гаиләләре өчен өстәмә ярдәм чаралары кирәклеге турында әйтеп узды.