Җыр һәм бию дәүләт ансамбле Уфа тамашачысына «Хәзинә» программасын тәкъдим итә
2 апрельдә 19.00 сәгатьтә Уфаның мәдәният сараенда Татарстан Республикасы Дәүләт җыр һәм бию ансамбле «Хәзинә» программасын тәкъдим итәчәк. Иҗат кичәсендә тамашачылар шаян җыр-биюләр ишетә һәм карый алачак.
«Бу Башкортстан башкаласына беренче баруыбыз гына түгел. Күршеләребезне нәрсә белән сөендерә алуыбыз турында озак уйландык. Аларга көлке һәм шатлык бүләк итәргә булдык. Алтын коллекциябездәге җырлар һәм биюләрдән башка булмаячак. Тамашачыны бай татар мәдәнияте белән таныштыру - безнең төп миссиябез», - дип сөйләде «Татар-информ»га ансамбльнең сәнгать җитәкчесе, Россиянең атказанган, Татарстанның халык артисты Айрат Хәмитов.
Концертның беренче бүлегендә кунаклар «Аулак өй» вокаль-хореографик композициясен күрәчәк. Ул күңел ачу, шатлык, ваемсызлык рухы һәм яшь йөрәкләрнең яшәеше белән сугарылган. Программа мәзәк-такмазалар һәм баш әйләндергеч биюләр белән баетылган, дип хәбәр итә ансамбльнең матбугат хезмәте.
«Аулак өй» - татар һәм башкорт халыкларының мәдәниятләре, традицияләре якынлыгының ачык мисалы. Хореограф һәм балетмейстер Фәйзи Гаскәров аны Татарстан композиторы Александр Ключарев музыкасына куйган, ә әсәрнең нигезендә татар язучысы һәм шагыйре Нәкый Исәнбәт либреттосы ята.
Икенче бүлектә тирән фольклор тамырлары булган зур тарихлы номерлар яңгыраячак. Концерт кунаклары «Зөбәрҗәт» җырын, озын «Сибелә чәчәк»не, җиңел «Картуф» һәм виртуоз «Күн авылы»н тыңлаячак. «Казан кызлары биюе», «Гармун-гармун», «Егетләр» куелышлары тамашачыны милли хореография үзенчәлекләре белән таныштырачак, диелә хәбәрдә.
«Татар мәдәниятенең йөрәге Татарстан Республикасы Дәүләт җыр һәм бию ансамбле иҗатында тибә. Бу профессиональ коллектив татар халкының традицияләрен һәм гамәли сәнгатен саклый, иҗади яктан үзгәртә һәм тамашачыларга җиткерә. Ансамбльнең концерт программаларында хикәя һәм риваятьләр, лирик поэма һәм шаян рәсемнәр, спектакль һәм халык мюзикллары бар. Нәкъ менә шуңа күрә Татарстан Республикасы Дәүләт җыр һәм бию ансамбленең һәр концерты - һәрвакыт зур мәдәни вакыйга», - диде Айрат Хәмитов.