III «Насретдин укулары» конференциясендә гаилә кыйммәтләре турында сөйләштеләр
Марий Эл Республикасы Бәрәңге районының Бәрәңге шәһәр тибындагы бистәсендә «Гаилә һәм гаилә традицияләре – Ислам өммәте нигезләренең берсе» темасына «Насретдин укулары» III төбәкара фәнни-белем бирү конференциясе узды. Бу хакта Россия мөселманнары Диния нәзарәте хәбәр итә.
Конференция Россиядә Гаилә елы һәм РФ мөселманнары Диния нәзарәте инициативасы белән билгеләп үтелүче Мөселман гаиләсе елы уңаеннан үткәрелде. Вакыйга шулай ук фәнни иҗатының шактый өлеше гаилә мәсьәләләренә һәм җәмгыятьне рухи-әхлакый тәрбияләүгә багышланган мөселман дин эшлеклесе, дин белгече, мөфти Ризаэтдин Фәхретдиннең (1859-1936) 165 еллыгына багышланган.
Чараны Марий Эл Республикасы Бәрәңге муниципаль районы администрациясе һәм «Мәдинә» нәшрият йорты ярдәме белән РФ мөселманнары Диния нәзарәте, Марий Эл Республикасы мөселманнары Диния нәзарәте, Марий Эл Республикасы Мәдәният, матбугат һәм милләтләр эшләре министрлыгы оештырган.
Район Мәдәният йортында дин әһелләре, дәүләт хакимияте органнары һәм муниципалитетлар вәкилләре, галимнәр, туган якны өйрәнүчеләр, педагоглар, җәмәгать эшлеклеләре һәм мөселман җәмгыятьләре активистлары җыелды.
РФ мөселманнары Диния нәзарәтенең дини оешмалар белән эшләү бүлеге җитәкчесе Альберт Азизов РФ мөселманнары Диния нәзарәте рәисе баш мөфти шәех Равил Гайнетдинның сәламләү сүзләрен укыды. Катнашучыларны шулай ук Марий Эл Республикасы мөселманнары Диния нәзарәте рәисе имам-мөхтәсиб Фәрит Шаһиев җылы сәламләде.
Моннан тыш, конференциядә катнашучыларга сәламләү сүзләре белән Бәрәңге муниципаль районы башлыгы Әлфит Ибраев, Марий Эл Республикасы Бәрәңге муниципаль районы администрациясе башлыгы Олег Попов, Марий Эл Республикасы Мәдәният, матбугат һәм милләтләр эшләре министрлыгының милләтара һәм конфессияара мөнәсәбәтләр бүлеге башлыгы Михаил Чемышев, Киров өлкәсе мөселманнары Диния нәзарәте рәисе имам-мөхтәсиб Нияз Кашапов мөрәҗәгать итте. Татарстан Республикасы мөселманнары Диния нәзарәте исеменнән катнашучыларны Татарстанның Арча районы имам-мөхтәсибе Әмир Миңнемуллин сәламләде.
Чара кысаларында бүләкләү тантанасы булды. Россия мөселманнары дини лидеры мөфти шәех Равил Гайнетдинның Рәхмәт хатлары белән күп балалы актив мәхәллә кешеләрен билгеләп үттеләр.
«Насретдин укулары»нда катнашучылар билгеләп үткәнчә, гаилә һәм никах, буыннар арасындагы бәйләнешләр, балалар һәм ата-аналар арасындагы мөнәсәбәтләр институтын ныгыту һәр кешенең иминлегенә китерә. Моннан тыш, бу иҗтимагый мөнәсәбәтләрне сәламәтләндерүгә, динара һәм милләтара мөнәсәбәтләрне гармонияле итүгә, традицион мәдәниятләрне һәм телләрне саклауга, тарихи хәтерне торгызуга ярдәм итә, диелә хәбәрдә.