Төркия Сабан туенда Татарстан Президентының котлавы яңгырады
Татарстан Президенты Рөстәм Миңнеханов Төркия татарларын Сабан туе бәйрәме белән котлады. Аның котлау мөрәҗәгате Искешәһәр төбәгендәге Османия (Куруһүйүк) татар авылында үткән Сабан туенда яңгырады.
Татарстан җитәкчесенең бөтендөнья татар бәйрәме - Сабан туе белән котлау сүзләрен Төркиядәге милләттәшләргә Татарстанның Төркиядәге тулы вәкаләтле вәкиле урынбасары Альберт Ялышев җиткерде. Рөстәм Миңнеханов Төркия сабан туе кунакларына исәнлек-саулык, бәхет, тынычлык, иминлек һәм күтәренке кәеф теләгән.
Татарстан Президентның котлау хатында кабатланмас төсләре, киң колачы, бәйгеләренең төрлелеге белән Сабан туеның күркәм үзенчәлекле тантана булуы бәян ителгән. Аның халык риваятьләрендә, җыр-әкиятләрдә күренекле татар сәнгать әһелләре тарафыннан мәңгеләштерелгәнлеге, чорлар, гасырлар аша киләчәккә юл алган бәйрәм булуы ассызыкланган.
“Татарлар кайда гына яшәсәләр дә, Сабан туе – барысы өчен туган телебез, мәдәниятебез һәм ата-бабаларыбызның изге гамәлләр белән бәйләнешне саклаучы бәрәкәтле көч. Ул бик күп төбәк, илләрдә уздырыла, бу исә татар мәдәниятен танытуга хезмәт итә, төрле юнәлештәге хезмәттәшлекне үстерү мөмкинлекләрен ача”, - диелгән Татарстан Президенты котлавында.
Татар авылы Османиядәге Сабан туе бәйрәме 12 июньдә үткәрелде. Ул - быел Төркиядә оештырылган бердәнбер Сабан туе. Аны Искешәһәр татар җәмгыяте оештырды. Анда илнең төрле шәһәрләреннән меңгә якын татар катнашты.