Stambulda ýasama spirtli içgiler sebäpli ölenleriň sany 23 adama ýetdi
Stambulyň häkimliginiň 15-nji ýanwarda ýaýradan beýanatyna görä, 13-nji ýanwardan bäri şäherde 66 adamyň ýasama spirtli içgilerden zäherlenendigi hasaba alyndy.
“Zäherlenen adamlardan 23 sanysy öldi, 32 sany näsagyň saglyk ýagdaýy agyr bolup, olaryň bejergisi dowam edýär. Şol bir wagtda, başga-da sekiz näsagyň bejergisi adaty otaglarda dowam edýär. Bejergisi tamamlanan üç adam hassahanadan boşadyldy” diýlip, beýanatda bellenilýär.
Türk metbugaty ýasama içgiler sebäpli üç türkmenistanlynyň ölendigini, ýasama spirtli içgileri öndürmekde we satmakda güman edilýän iki türkmen raýatynyň tussag edilendigini habar berdi.
Stambulyň häkimi Dawut Gül 14-nji ýanwarda şäherde ýasama spirtli içgileri satýan 63 sany edara-kärhananyň ygtyýarnamasynyň ýatyrylandygyny we ýapylandygyny habar berdi.
"Ýasama/bikanun spirtli içgileri satmak bilen ölüme sebäp bolanlaryň hemmesi anyklanýar we jogapkärçilige çekilýär. Seresap boluň! Ölüm hadysalary artýar" diýip, Gül "X" sosial ulgamyndaky sahypasynda ýazdy.
Özbegistanyň Stambuldaky Baş konsulhanasy özüniň Telegram sosial ulgamyndaky sahypasynda çap eden maglumatynda ýasama içgiler sebäpli ölen özbek raýatlarynyň sanynyň alty adama ýetendigini habar berdi.
"Bulardan 5 sanysy erkek we bir sanysy aýal" diýlip, 14-nji ýanwarda çap edilen habarda bellenilýär.
Bu ýagdaýlar barada Türkmenistanyň Ankaradaky ilçihanasy we Stambuldaky konsulhanasy häzire çenli haýsydyr bir beýanat ýaýratmady.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.