Türkmen howaýollarynyň Aşgabatdan Moskwa reýsi ýatyryldy
Domodedowa aeroportunyň websaýtyndaky maglumata görä, Aşgabat – Domodedowa ugry boýunça T5 703 belgili reýs Moskwa 1-nji awgustda ýerli wagt bilen 21:15-de gonmalydy. Tabloda türkmen howaýollaryna degişli bu reýsiň ýatyrylandygy görkezilýär.
Azatlygyň Aşgabatdaky çeşmelerine görä, reýs iki tarap boýunça-da, hem Moskwa we yzyna Aşgabat ugurlary boýunça ýatyrylypdyr. Şol bir wagtda, Kazan ugry boýunça meýilleşdirilen reýsler saklanyp galýar.
Reýsiň ýatyrylmagynyň sebäpleri aýdyňlaşdyrylmaýar. Türkmen howaýollarynyň edaralaryndan maglumat almak başartmady.
Türkmenistandan Russiýa uçuşlary Türkmen howaýollary we Russiýanyň “S7” awiakompaniýasy amala aşyrýar.
“Moskwa ähli reýsleriň ýatyrylandygyny ýazýarlar. Kazana uçuşlar entek amala aşyrylýar. S7-iniň reýsleriniň ýagdaýy belli däl” diýip, Azatlygyň çeşmesi 1-nji awgustda habar berdi.
Türkmenistanda Russiýanyň şäherlerine bolan reýslere uly talap bildirilýär. Azatlygyň Aşgabatdaky habarçysy Moskwa biletleriň şu ýylyň dekabryna çenli eýýäm satylyp gutarandygyny aýdýar.
Azatlygyň redaksiýasy reýsleriň ýatyrylmagynyň jikme-jiklerini we sebäplerini öwrenmäge synanyşýar.