Hytaý häkimiýetleri bir aýda 60 müňe golaý adamyň COVID-19 sebäpli ölendigini aýdýar
“Roýters” habar gullugynyň ýazmagyna görä, Hytaýyň Milli saglyk komissiýasy 8-nji dekabrdan 12-nji ýanwara çenli aralykda, COVID-19 bilen bagly näsaglyklar esasynda, 59,938 adamyň ölendigini aýtdy. Şol bir wagtda, hytaý hünärmenleri ýurtdaky wirus möwjemesiniň iň ýokary derejesiniň geçendigini aýdýarlar.
Mundan öň häkimiýetler ýurtda pandemiýa başlaly bäri 5000 töweregi adamyň ölendigini we dekabr aýynda ölen näsaglaryň sanynyň 10-a ýetmändigini habar beripdiler.
Bütindünýä saglyk guramasy golaýda hytaý häkimiýetlerini ölenleriň sanyny azaldyp görkezmekde aýyplady.
Angliýanyň 'Airfinity” kompaniýasy dekabr aýynyň aýagynda Hytaýda koronawirus ýokuşmalaryndan günde 9000 çemesi adamyň ölen bolmagynyň ähtimaldygyny çaklady.
“Bloomberg” neşiri bolsa, COVID-19-yň möwç almagy bilen baglylykda, ýurtdaky krematoriýalaryň işiniň aşa köpelendigini habar berdi.