Türkmenistanda Garaşsyzlyk güni üçin köpçülikleýin taýýarlyk çäreleri geçirilip başlandy
Azatlyk Radiosynyň ýurduň günbatar welaýatyndaky habarçysy Garaşsyzlyk gününe görülýän taýýarlyklaryň pandemiýadan öňki ýyllardaky depginine gaýdyp gelendigini aýdýar.
"2019-njy ýyldan bäri ilkinji gezek sebitden ýüzlerçe adam paýtagta iberilýär. Deňiz pyýada goşunynyň, welaýat migrasiýa bölüminiň we Içeri işler ministrliginiň sebitdäki goşunynyň işgärleri 5-nji sentýabrda Aşgabada ugradyldy. Olar garaşsyzlyk baýramy mynasybetli geçiriljek köpçülikleýin çärelere gatnaşarlar we oňa häzirden taýýarlyk görüp başlarlar" diýip, balkanly medeniýet işgäri anonimlik şertinde 6-njy sentýabrda gürrüň berdi.
Ýagdaýdan habarly býujet işgärleriniň ençemesiniň habarçymyza aýtmagyna görä, Türkmenbaşy şäher Medeniýet öýünden, "Ruhyýet" köşgünden we başga-da tanymal aýdymçylar toparyndan saýlanyp alnan 50-den gowrak medeniýet işgäri hem eýýäm paýtagta gitdi.
"Welaýat boýunça jemi 560 adam çärä ugradylyp, olaryň üsti ýetiriler. Olar milli lybaslarda welaýatyň adyndan çykyş ederler" diýip, efirde atlandyrylmasyzlygyny soran býujet işgäri aýtdy.
Mundan başga-da, deputatlaryň we Adalat ministrliginiň ýerli bölümleriniň işgärleriniň onlarçasy-da paýtagtda iberildi. Olar Halk Maslahatynyň mejlisine häzirden taýýarlyk görerler.
"Şu gün welaýat häkimliginiň resmileri olaryň awtobuslarynyň kerwenlerini ugratdylar. Olar öz maddy çykdajylarynyň hasabyna 22 gün paýtagtdaky myhmanhanalarda ýaşamaly bolýarlar" diýip, býujet işgäri aýtdy.
Bellesek, mundan öňki ýyllarda garaşsyzlyk baýramyndan öň Halk maslahatynyň mejlisi geçirilýärdi we gazanylandygy aýdylýan üstünlikler barada gürrüň edilýärdi, ýöne ýurtdaky kyn meseleler asla agzalmaýardy. Bu ýyl türkmen hökümeti Halk maslahatyny agzamazdan, 23-nji sentýabrda Döwlet maslahatynyň geçiriljekdigini soňky bir aý bäri tekrarlaýar.
Şu ýyl Türkmenistan garaşsyzlygynyň 31 ýyllygyny öz ýakyn taryhyndaky üçünji lideriň ýolbaşçylygynda baýram edýär. Has dogrusy, ýurduň iň möhüm baýramlarynyň başyny çekýän bu sene martda häkimiýet başyna geçen prezident Serdar Berdimuhamedowyň ýolbaşçylygynda ilkinji gezek bellenilýär.
Habarçymyz Aşgabatda geçiriljek harby parada gatnaşjak organ işgärlerine, harbylara we býujet işgärlerine Garaşsyzlyk gününe "şu ýyl has ýokary derejede taýýarlyk görülmelidigi" barada berk duýduryş berlendigini aýdýar.
Welaýatyň harby we organ işgärleriniň birnäçesiniň anonimlik şertinde habarçymyza aýtmagyna görä, parada gatnaşýan raýatlara "iň bir kiçi ýalňyşlyk üçin jogapkärçilige çekiljekdigi, işlerinden kowuljakdygy" barada haýbat atyldy.
"Parada gatnaşjaklardan dil haty we düşündiriş hem alyndy" diýip, ýurduň deňiz güýçleriniň bir agzasy anonimlik şertinde aýtdy.
Azatlyk bu aýdylanlar barada Balkan welaýat häkimliginden we deňiz güýçlerinden goşmaça maglumat ýa kommentariý alyp bilmedi.
Bu aralykda, "Türkmenistanyň Hronikasy" neşiri Aşgabatda garaşsyzlyk baýramyna görülýän taýýarlyk çäreleriniň şu aýyň başynda geçirilip başlanandygyny habar berýär.
Garaşsyz neşiriň 5-nji sentýabrda çap eden habaryna görä, döwlet we býujet edaralarynyň işgärleri her gün irden sagat 6:30-8:30 aralygynda "Dagdan" stadionynda geçirilýän köpçülikleýin taýýarlyklara gatnaşýarlar we şondan soňra işlerine gidýärler.
"Köpçülikleýin taýýarlyk çärelerine harbylar we talyplar hem gatnaşýarlar" diýip, neşir belleýär.
Häkimiýetler döwlet garaşsyzlygynyň 31 ýyllygyna we onuň öňüsyrasynda geçirilýän maslahata aýratyn ähmiýet berýärler. Türkmen prezidenti 12-nji awgustda geçirilen hökümet maslahatynda garaşsyzlyk baýramy mynasybetli geçiriljek çärelere we Döwlet maslahatyna "gowy taýýarlyk görülmelidigini" aýtdy.
Türkmenistan 1991-nji ýylyň oktýabr aýynda SSSR-den garaşsyzlygyny yglan etdi. 2017-nji ýyla çenli Garaşsyzlyk güni 27-nji oktýabrda, garaşsyzlyk yglan edilen güni bellendi. 2017-nji ýylda Türkmenistanyň şol döwürdäki prezidenti Gurbanguly Berdimuhamedowyň teklibi boýunça ýurduň parlamenti bu senäni 27-nji sentýabra geçirdi. Häkimiýetler senäniň üýtgedilmeginiň sebäbini aç-açan we takyk düşündirmediler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.