امریکا ته په غیرقانوني توګه د خلکو د بیولو په تړاو یوه شبکه نیول شوې
د امریکا د ملي امنیت د شورا ویاندې ادریان واتسن پرون سې شنبې په یوه اعلامیه کې وویل، امریکایي چارواکي باور نه لري چې د ازبکستان اتباع دې چې دغه قاچاقي شبکه یې جوړه کړې وه، له کومې تروریستي ډلې سره تړاو ولري یا دې کوم تروریستي برید پلان کړی وي.
په اعلامیه کې د بهرنۍ تروریستي شبکې نور جزییات نه دي په ډاګه شوي، خو یوه امریکایي چارواکي چې د خبرو کولو صلاحیت یې نه درلود او نوم یې نه دی ښودل شوی، اسوشېټېډپرېس آژانس ته ویلي چې هغه د اسلامي دولت یا داعش ډله ده.
په اعلامیه کې دا هم نه دي ویل شوي چې متحدو ایالتونو د دغې شبکې د کشف او د مهمو غړیو د نیولو لپاره یې له کومو هېوادونو سره همکاري کړې ده.
د امریکا د فدرالي پولیسو ادارې چې په دې اړه تحقیقات کوي، هم تایید کړې چې د دغو مهاجرینو اړوند یې کوم ځانګړی ترهګریز ګواښ نه دی په نښه کړی.
متحدو ایالتونو ته د خلکو د قاچاق د هڅو خبر داسې مهال ورکول کېږي چې جمهوري غوښتونکي د بایډن پر ادارې تور لګوي چې د پولو د خوندي کولو لپاره کافي کار نه کوي او ملي امنیت په خطر کې اچوي.