Бомгартнер: Отворањето на преговорите со С.Македонија нема утврден рок
„Што се однесува до прашањето на проширувањето и отворање на преговорите за членство на Северна Македонија, за оваа тема нема некој точно утврден рок, затоа што тој зависи од меѓувладината конференција која ќе го означи почетокот на преговорите. Во овој момент е невозможно да се утврди точен датум, но, јасно е дека со француското претседателство постојано ќе се поддржува земјата, за да може работите да напредуваат конструктивно и во добра насока, со цел колку што е можно побрзо и во текот на француското претседателство да се постигне значителен напредок кој сите го очекуваат“, порача амбасадорот Бомгартнер пред членовите на Националниот совет за евроинтеграции пред кој ги презентираше приоритетите на француското претседателство.
Според него, нема да се зборува само аспект на прашањето за членство, туку и од останатите теми кои се важни за Унијата, но и за земјата како идна членка на ЕУ.
„Многу зборуваме за ЕУ, но, секогаш низ призмата на членството и проширувањето, што е можеби нормално и природно. Но, Европа се соочува со големи предизвици и за да можат да се решат има политичка амбиција во повеќе области од сето тоа и вие Македонците сте директно засегнати, затоа што е добро да се подготви утрешна Европа, но, тоа е и ваша иднина како европски народ и како земја која еден ден ден ќе биде дел од ЕУ“, додаде тој.
Евроамбасадорот Дејвид Гир порача дека е важно спроведувањето на реформите.
„Реформите кои ги планирате ќе бидат добри за Европската унија, а со тоа и за идните земји членки и за оваа држава. Важно е во исто време да видиме напредок на билатералното прашање со Бугарија и да видиме дека Северна Македонија продолжува да напредува и со реформите на својот европски пат, рече Гир.
Гир порача и дека од владејачките и од опозициските партии очекува обединување околу европските приориотети како придобивка за сите. Надежите дека во декември земјата ќе добие датум за преговори за време на словенечкото претседателство со ЕУ се урнаа откако Бугарија соопшти дека нема намера да ја промени својата позиција.
Петков сепак доаѓа во Скопје
Инаку, Бугарија ја блокира македонската европска интеграција од 2020 година, тогаш главно поради историски нерешени прашања, а со инсистирање Скопје да признае дека македонската нација не постоела до 1944 година, дека македонскиот јазик е норма на бугарскиот, дека двете земји имаат заедничка историја, а таа е бугарска.