ცვლილებას, რომლის მიზანიც ძალადობისგან ბავშვების დაცვაა, აშშ-ის საელჩო მიესალმება

აშშ-ის საელჩო მიესალმება საქართველოს პარლამენტს და ადამიანის უფლებათა და სამოქალაქო ინტეგრაციის კომიტეტს, სოფო კილაძის თავმჯდომარეობით, მნიშვნელოვანი კანონის მიღების გამო, რომელიც მიზნად ისახავს ბავშვების დაცვას  ძალადობისგან, სექსუალური ექსპლუატაციისა და ტრეფიკინგისგან.


საქართველოს სისხლის სამართლის კოდექსში ცვლილებები პარლამენტმა დღეს, 13 ივლისს დაამტკიცა.


როგორც საელჩო აღნიშნავს, ახალი საკანონმდებლო ცვლილებებით იმატებს სასჯელი ბავშვთა მიმართ მძიმე სექსუალური დანაშაულის ჩადენისთვის და უმჯობესდება სასჯელის ზომის თანმიმდევრული გამოყენება. აგრეთვე, კანონი განმარტავს იმ მუხლებს, რომელიც ბუნდოვანი იყო და შეიცავდა მათი არაეფექტურად აღსრულების საშიშროებას.


საელჩოს მიაჩნია, რომ ამ კანონს შეუძლია, მნიშვნელოვნად გაზარდოს დანაშაულის აღკვეთის, დევნისა და დამნაშავეთა მკაცრად დასჯის შესაძლებლობები და დაიცვას ბავშვები და სხვა დაუცველი პირები ამ საზარელი საფრთხეებისგან.


„ჩვენ მუხლჩაუხრელად უნდა ვიშრომოთ ჩვენი საზოგადოებებიდან ბავშვთა ექსპლუატაციის აღმოსაფხვრელად. ეს ახალი კანონები ამ მიზნისკენ გადადგმული ძირითადი ნაბიჯია. ამერიკის საელჩო კვლავაც გააგრძელებს ბავშვთა დასაცავად ეფექტური გადაწყვეტილებების მხარდაჭერასა და ინვესტიციას. ამ კანონის მიღებით საქართველომ წარმოაჩინა ლიდერობა. ჩვენ მზად ვართ, დავეხმაროთ საქართველოს ამ კანონმდებლობის აღსრულებასა და შემდგომი რეფორმების განხორციელებაში მსხვერპლთა დაცვისა და დამნაშავეთა პასუხისგებაში მიცემის მიზნით”, - ნათქვამია საელჩოს განცხადებაში.


საკანონმდებლო ცვლილებებით მოწესრიგდა ისეთი საკითხები, როგორიცაა არასრულწლოვნის ჩაბმა პროსტიტუციაში, ასევე პორნოგრაფიული ნაწარმოების უკანონოდ დამზადებასა და გასაღებაში. გარდა ამისა, სექსუალური მიზნებისათვის არასრულწლოვნისთვის შეხვედრის შეთავაზებასთან დაკავშირებული საკითხები.


საკანონმდებლო ცვლილების თანახმად, იკრძალება პირობითი მსჯავრის გამოყენების შესაძლებლობა არასრულწლოვნის წინააღმდეგ სისხლის სამართლის კოდექსის კონკრეტული მუხლებით გათვალისწინებული დანაშაულის ჩადენის შემთხვევაში, თუნდაც მხარეებს შორის გაფორმებული იყოს საპროცესო შეთანხმება. ამასთან, არასრულწლოვნის წინააღმდეგ სისხლის სამართლის კოდექსის კონკრეტული მუხლებით გათვალისწინებული დანაშაულის ჩადენის შემთხვევაში აკრძალული იქნება მსჯავრდებულის სასჯელისაგან სრულად გათავისუფლება. გამკაცრდა პასუხისმგებლობა 14 წელს მიუღწეველი პირის მიმართ სექსუალური ხასიათის სხვაგვარი ქმედების ჩადენისთვის.