სალომე ზურაბიშვილი: სრული სიჩუმე სუფევს ... ეტყობა თბილისი იცავს რეკომენდაციებს

საქართველოში კომენდანტის საათის ამოქმედებას საქართველოს პრეზიდენტი სალომე ზურაბიშვილი „ფეისბუკზე“ გამოეხმაურა.


„სრული სიჩუმე სუფევს ... ეტყობა თბილისი #იცავსრეკომენდაციებს!

მეამაყება ეს ჩვენი მოქალაქეობრივი და პასუხსმგებელი ქცევა ... ასეთ მოწესრიგებულ და კანონმორჩილ მიდგომით დავამარცხებთ კორონასაც და მეტსაც...“ - დაწერა სალომე ზურაბიშვილმა.




საქართველოში 21:00 საათიდან 06:00 საათამდე გადაადგილება აიკრძალა. მოქმედებს კომენდანტის საათი, რაც ნიშნავს იმას, რომ აკრძალულია გადაადგილება, როგორც ქვეითად, ასევე ტრანსპორტით.


დაუმორჩილებლობის შემთხვევაში არის გათვალისწინებული ჯარიმა - ფიზიკურ პირებზე 3 000 ლარი, ხოლო იურიდიულ პირებზე - 15 000. გადაადგილება შესაძლებელი იქნება მხოლოდ სპეციალური საშვების მქონე პირებისა და ავტომანქანებისთვის.


კორონავირუსის გავრცელების შესაჩერებლად საქართველოში 21 აპრილამდე გამოცხადებული საგანგებო მდგომარეობის ფარგლებში ამოქმედებული „ფაქტობრივად საკარანტინო რეჟიმი“ სხვა შეზღუდვებსაც ითვალისწინებს.


31 მარტის მდგომარეობით, საქართველოში ლაბორატორიულად დადასტურებულია კორონავირუსით ინფიცირების 110 შემთხვევა, მათგან 21 გამოჯანმრთელდა. კარანტინის რეჟიმში იმყოფება 4995 ადამიანი, სტაციონარში, მეთვალყურეობის ქვეშ - 278.