კვლევის თანახმად, პარლამენტი მთავრობაზე სათანადოდ არ ზედამხედველობს
არასამთავრობო ორგანიზაციამ, „საერთაშორისო გამჭვირვალობა - საქართველომ” წარმოადგინა მე-9 მოწვევის პარლამენტის საქმიანობაზე დაკვირვებით მომზადებული კვლევა, რომელიც მოიცავს პერიოდს 2016 წლის 18 ნოემბრიდან 2017 წლის 31 დეკემბრამდე. ერთ-ერთ დადებით ტენდენციად დასახელებულია ის, რომ მონიტორინგის პეროდში, კვორუმის არარსებობის გამო არ ჩაშლილა არცერთი პლენარული სხდომა, მაშინ, როცა მე-8 მოწვევის პარლამენტში კვორუმის არარსებობის გამო არ შედგა 10 სხდომა, მათგან 2 რიგგარეშე. დადებით ტენდენციებად დასახელებულია მთავრობის მიერ კანონშემოქმედებითი საქმიანობის გეგმის ორჯერ წარმოდგენაც, გენდერული თანასწორობის საბჭოს მეტად გააქტიურება, კომიტეტების სხდომებზე აღმასრულებელი ხელისუფლების წარმომადგენლების დასწრება და საქმიანობის პერიოდული ანგარიშების წარმოდგენა. ამასთან, სხდომებს უმეტესად მინისტრის მოადგილეები ესწრებოდნენ. „საერთაშორისო გამჭვირვალობა-საქართველო“ დადებითად აფასებს სტრასბურგის სასამართლოს მიერ საქართველოს წინააღმდეგ მიღებული გადაწყვეტილებების აღსრულების შესახებ სამთავრობო ანგარიშების განხილვასაც და სახალხო დამცველის კანდიდატურის შერჩევას სამოქალაქო საზოგადოებასთან კონსულტაციის შედეგად. არასამთავრობო ორგანიზაციის დაკვირვებით, მე-9 მოწვევის პარლამენტის საქმიანობის პირველ წელს დეპუტატები უფრო აქტიურები იყვნენ საკანონმდებლო ინიციატივების წარდგენის მხრივ და ამ უფლებით ისარგებლა პარლამენტის 92-მა წევრმა.
ამავე კვლევის თანახმად, გაუარესებულია მდგომარეობა კანონპროექტების დაჩქარებული წესით განხილვის მიმართულებით. მე-9 მოწვევის პარლამენტმა საანგარიშო პერიოდში ამ წესით განიხილა 213 პროექტი, მათ შორის 111 მთავრობის სტრუქტურულ ცვლილებებს ეხებოდა. თუმცა, იყო 12 შემთხვევა, როცა ამ წესით პროექტის განხილვის მოთხოვნა არ დაკმაყოფილდა. „საერთაშორისო გამჭვირვალობა-საქართველო“ პრობლემად მიიჩნევს კანონის ამოქმედების გადავადებასაც. პარლამენტმა გამარტივებული წესით განიხილა და მიიღო 77 ასეთი პროექტი, რაც 30-ით აღემატება მე-8 მოწვევის პარლამენტის მიერ გამარტივებული წესით განხილული კანონპროექტების რაოდენობას. ამავე კვლევით, სამუშაო ჯგუფების საქმიანობა ზოგიერთ შემთხვევაში იყო ფორმალური ხასიათის. მაგალითად, მაუწყებლობის შესახებ კანონში ცვლილებების მომზადების პროცესში ჯგუფის წევრები ჩართულნი არ ყოფილან.
„საერთაშორისო გამჭვირვალობა-საქართველოს“ შეფასებითვე, დეპუტატები სათანადოდ არ იყენებენ აღმასრულებელ ხელისუფლებაზე ზედამხედველობის შესაძლებლობებს. საანგარიშო პერიოდში არ შექმნილა საგამოძიებო კომისია, მათ შორის ისეთ მნიშვნელოვან ფაქტებზე, როგორიცაა აზერბაიჯანელი ჟურნალისტის, აფგან მუხთარლის გატაცება და ყოფილი აუდიტორის, ლაშა თორდიას ცემა. კვლევის მიხედვით, სადეპუტატო შეკითხვების უმეტესი ნაწილი კვლავ სტატისტიკური ინფორმაციის გამოთხოვას შეეხება და არ უკავშირდება აღმასრულებელი ხელისუფლების მიერ სამთავრობო პროგრამის შესრულების კონტროლსა და საჯარო პოლიტიკის სხვა მნიშვნელოვან საკითხებს. გარდა ამისა, პარლამენტი არ ახორციელებს მთავრობის კანონშემოქმედებითი საქმიანობის გეგმის მონიტორინგს.