Зәй эшмәкәре балаларны сөендерде
Зәйдә биш ел рәттән Раштуа бәйрәме уңаеннан “Пирамида” кафесында социаль адаптация буенча авырлыклар кичерүче гаиләләрдә тәрбияләнүче балалар өчен яшьләр эшләре идарәсе, социаль яклау бүлеге хезмәткәрләре киң күңелле эшмәкәр, кәлеге кафеның хуҗасы Фәргать Хәйруллин ярдәме белән чыршы бәйрәме оештыра. Быел да мондый күңелле бәйрәм 1-13 яшьлек 25 баланы үзенә җыйды. Яшьләр эшләре идарәсенең Роза Гатауллина җитәкчелегендәге “Әйдаманнар мәктәбе” активистлары театрлаштырылган тамаша әзерләсә, социаль яклау бүлеге белгечләре һәр баланы да уеннарда катнаштыру белән мәшгуль булды. Эшмәкәр балалар өчен бәйрәм өстәле әзерләтте, Кыш бабай күчтәнәчләре өләште.