Урдалы авылы мәдәният йортында “Фронттагыдай тылда көрәш барды” күренеше
Лениногорск районы Урдалы авылы мәдәният йортында “Юбилейлар парады” район смотры кысаларында авыл үзешчәннәре тарафыннан әзерләнгән “Фронттагыдай тылда көрәш барды” исемле 1 пәрдәлек күренеш күрсәтелде.
Күренеш Бөек Җиңүнең 70 еллыгына багышланды. Мирсәй Әмирнең “Миңлекамал” һәм Гомәр Бәшировның “Намус” романнары буенча куелган күренештә Бөек Ватан сугышы чорында авылда хатын-кызларның, балаларның, карт-корының фидакарь хезмәтләре чагылдырылды.
Бу күренешне чынлыкта гәүдәләндерү өчен, тамашачыны ышандыру өчен күп көч куелды. Иң беренче сценарийны язганнан соң, шул чорга туры килгән киемнәр, сәхнә кирәк-яракларын барлау башланды: чормаларда күптән тузан җыеп яткан эш кораллары, әбиләр сандыгындагы киемнәр чыгарылды. Хәтта уфалла арбасына кадәр бар иде. Аны авылдашыбыз Рафис Рәхимов ясап бирде.
Рольләрне мәдәният йорты, китапханә хезмәткәрләре белән рәттән авыл башлыгы урынбасары Әхмәтова Гөлшат, сыер савучылар Галимова Римма, Бикбов Хәмит, инде пенсия яшендә булуына карамастан, төркемебезнең алыштыргысыз артисты Шайдуллина Илһамия, клубның техник хезмәткәре Фаттахова Фәүзия, иң кечкенә артисткабыз-биючебез Бәдретдинова Эльвиналар бик матур итеп башкарып чыктылар. Музыка өлешен авыл башлыгы Мостафин Мосавир алып барды.
Күренешнең азагында Нәфисә Газизнең үлгән хәбәрен укыганда катнашучылар да, тамашачылар да күз яшьләрен тыя алмадылар, һәрберсенең күз алдына сугышның никадәр аяусыз икәнлеге килеп басты. Шәһәрдән килгән жюри әгъзаларына да тамашабыз ошады. Ә инде авылыбызның бердәнбер сугыш ветераны Хөснетдинов Касыйм абыйның хуплап әйткән сүзләре катнашучыларга тагы да дәрт өстәде.