Чабаксарда дини йолалар башкару өчен «Болгар» мәчете янында бина ясыйлар
(Казан, 23 сентябрь, «Татар-информ»). Чабаксардагы «Болгар» мәчете территориясендә дини йолалар башкару өчен бина төзекләндерелә.
Республикада яшәүче мөселманнарның теләкләрен истә тотып, Чувашия мөселманнары диния нәзарәте «Болгар» мәчете территориясендәге кечкенә бинаны шәһәр халкы һәм якын-тирә авылларда яшәүчеләргә дини йолаларны үтәү өчен җиһазландырырга булган. Бу хакта Россия мөселманнарының Дини җыены сайты яза.
Мөселманнар өчен мәрхүмнәрне соңгы юлга лаеклы итеп озату, мәетне юу, хөрмәтләп җеназа намазы уку һәм мөселман зиратында җирләү фарыз гамәл булып санала, диелә хәбәрдә.